भारताचो दोळो सेमी फायनलीचेर

भांगरभूंय | प्रतिनिधी

बायलांचे आशिया करंड क्रिकेट सर्तींत आयज सध्याचो वस्ताद भारत आनी नेपाल ह्या पंगडां मदीं मॅच जातली. अ गटांतली भारताची ही निमाणी मॅच आसा. ही मॅच जिखून सेमी फायनलींतली सुवात निश्चीत करपाचो ताचो यत्न आसतलो.

भारताचो पंगड सध्या उत्कृश्ट फॉर्मांत आसा. पयले मॅचींत ताणें पाकिस्तानाक 7 विकेटींनी हारयिल्लो, जाल्यार दुसरे मॅचींत यूएई आड 78 धांवड्यांनी जैत जोडिल्लें. दुसरे वटेन नेपालान आपले पयले मॅचींत यूएईक हारोवपाक येसस्वी थारिल्लो. पूण, दुसरे मॅचींत ताका पाकिस्ताना आड 9 विकेटींनी व्हड हार घेवची पडिल्ली.

भारताची सेमी फायनलींतली सुवात लागींलागीं निश्चीत आसा. जाल्यार पाकिस्तानान आपले फाटली मॅच व्हडा फरकान जिखून आपले रन रेटीन बरीच सुदारणां केल्या. भारत हेर पंगडांचे स्थितीचेर नदर दवरचे परस आपली जैताची धांव कायम राखपाचेर लक्ष केंद्रीत करतलो. बॅटींग आनी बॉलींग दोनूय विभागांनी भारतान बरें प्रदर्शन केलां आनी अशेंच प्रदर्शन फुडल्या मॅचींनी लेगीत कायम दवरपाचो ताचो यत्न आसतलो.

ओपनर शेफाली वर्मा आनी स्मृती मंधान उत्कृश्ट फॉर्मांत आसा. पाकिस्ताना आड तांणी बरी बॅटींग केल्ली. जाल्यार यूएई आडचे मॅचींत मुखेली हरमनप्रीत कौर आनी रिचा घोष हांणी अर्द शेंकड्यांची खेळी केल्ली.

आक्रमक बॅटर रिचा घोष हिणें यूएई आड 29 बॉलांनी 64 धांवड्यो केल्ल्यो. तिकाच लागून भारतीय बायलांच्या पंगडान आंतरराष्ट्रीय टी-20त पयले खेपे दोनश्यांचो आंकडो हुपिल्लो. हरमनप्रीत कौरान 47 बॉलांनी 66 धांवड्यो करून सुत्रधाराची भुमिका वठयिल्ली.

बॉलींग विभागान लेगीत जबरदस्त प्रदर्शन केलां. रेणुका सिंग, पुजा वस्त्रकर हांणी अजून मेरेन सातत्यान बरें प्रदर्शन केलां. जखमी ऑफ स्पिनर श्रेयंका पाटीलाचे सुवातेर पंगडांत घेतिल्ले तनुजा कंवरान लेगीत आपली भुमिका योग्य रितीन सांबाळून चार ओव्हरींनी फकत 14 धांवड्यो दिवन एक विकेट घेतल्या.

दुसरे वटेन इंदू वर्माच्या फुडारपणाखाला खेळपी नेपाल पंगडान आपले पयले मॅचींत यूएईक हारोवन सर्तीक बरी सुरवात केल्ली. पूण, पाकिस्ताना आड तांचें कांयच शाणपण चलूंक ना. भारता सारक्या बळिश्ट पंगडाक हारोवपाक ताच्या सगल्याच खेळगड्यांक सर्वोत्कृश्ट प्रदर्शन करचें पडटलें.

भारताचो पंगडः हरमनप्रीत कौर (मुखेली), स्मृती मंधाना, शेफाली वर्मा, जेमिमा रॉड्रिग्स, रिचा घोष (विकेटकीपर), उमा छेत्री (विकेटकीपर), पुजा वस्त्रकर, दिप्ती शर्मा, अरुंधती रेड्डी, रेणुका सिंग, डी हेमलता, आशा शोभना, राधा यादव, तनुजा कंवर, सजना सजीवन.

नेपालाचो पंगडः इंदू बर्मा (मुखेली), काजोल श्रेश्ठ, रुबिना छेत्री, सबनम राय, सीता राणा मगर, राजमती एेरी, पुजा महतो, बिंदू रावल, रोमा थापा, ममता चौधरी, कबिता जोशी, कबिता कुंवर, डॉली भट्टा, कृतिका मरासिनी आनी समझाना खडका.