भांगरभूंय | प्रतिनिधी
पिराय चड आनी सतत दुयेंत आशिल्ल्यान तांकां देशाचें फुडारपण सक्षमपणान करपाक मेळना. तशेंच तांकां स्मृतीभ्रंशाचो त्रास जाता. म्हणल्यार याद उरना. देखून हे खेपे तांणी वेंचणूक लढोवची न्हय अशें तांच्या पक्षांत थोड्यांचें मत आशिल्लें.
अमेरिकेंत दर चार वर्सांनी राष्ट्रपती वेंचणूक जाता. अंदूं तीं नोव्हेंबर म्हयन्यांत जातली. वेंचणुकेचो प्रचार चालू आसा. अमेरिकेंत अध्यक्षीय लोकशाय आशिल्ल्यान दोन मुखेल पक्षाचे उमेदवार अध्यक्षपदा खातीर एकामेकांआड उबे रावतात. अमेरिकेंत रिपब्लिकन आनी डेमोक्रेटिक अशे दोन मुखेल पक्ष आसात. रिपब्लिकन हो परंपरावादी विचारांचो गट म्हळ्यार उजव्या विचारांचो जाल्यार डेमोक्रेटिक पक्ष हो पुरोगामी विचारांचो गट. अमेरिकेचे सध्याचे अध्यक्ष ज्यो बायडन हे ह्याच डेमोक्रेटिक पक्षांतले. तांणी फाटले वेंचणुकेंत रिपब्लीकन पक्षाचे उमेदवार आशिल्ल्या डोनाल्ड ट्रम्पाक हारयिल्ले. जी वेंचणूक 2020 वर्सा जाल्ली.
अध्यक्ष जाले उपरांत ज्यो बायडेनाचे कामगिरीचेर जायते जाण नाखूश आशिल्ले. चार वर्सांची तांणी केल्ली कामगिरी निराश करपी आशिल्ली. संवसारीक राजकारणांत तांणी कसलीच ठोस भुमिका घेतली ना, खास करून रशिया- युक्रेन झुजांतली ताची निष्क्रिय, मिळमिळीत भुमिका जायत्या जाणांक आवडली ना. संवसारीक महाशक्तीच्या मुखेल्या कडल्यान असले भुमिकेची कोणेच अपेक्षा करूंक ना आनी तांच्या चार वर्सांच्या काळांत अमेरिकेचें नांव घेवपा सारकें व्हडलेंशें कांयच घडूंक ना.
देखून लोकां मदींच न्हय तर ताच्या पक्षांतय तांकां विरोध निर्माण जाल्लो. इतलेंच न्हय तर तांचे पिरायेक आनी शारिरीक क्षमतेक लागून जायत्या जाणांनी प्रस्न उबे केल्ले. तांची पिराय 84 वर्सां. पिराय चड आनी सतत दुयेंत आशिल्ल्यान तांकां देशाचें फुडारपण सक्षमपणान करपाक मेळना. तशेंच तांकां स्मृतीभ्रंशाचो त्रास जाता. म्हणल्यार याद उरना. देखून हे खेपे तांणी वेंचणूक लढोवची न्हय अशें तांच्या पक्षांत थोड्यांचें मत आशिल्लें. उरफाटें तांचे प्रतिस्पर्धी रिपब्लिकन पक्षाचे डोनाल्ड ट्रम्प आक्रमक म्हणून वळखतात. तांचे उजव्या विचारसरणेक लागून आनी रशिये आडच्या खर विरोधाक लागून बायडनाक ते सहज हारयतले अशें लोकांक दिसता. वेंचणुके पयलीं अध्यक्षीय चर्चेंत तांणी बायडेनाक हारयिल्ले. तातूंतच तांचेर हल्लो जाल्यान सहानुभूतीचें ल्हार पातळ्ळां. देखून बायडनान वेंचणुकेंतल्यान फाटीं सरून उपाध्यक्ष कमला हॅरिसाक उमेदवारी दिवपा विशींचें चेपण पक्षांत वाडिल्लें. अखेर दोन दिसां पयलीं तांणी वेंचणुकेंतल्यान फाटीं सरपाची आनी उपाध्यक्ष कमला हॅरिस ही डेमोक्रेटिक पक्षाची उमेदवार जातली, अशी घोशणा केली.
देखून आतां हॅरिस आनी ट्रम्प हांचे मदली राजकी मॅच रंगतली. सध्या रिपब्लीकन डोनाल्ड ट्रम्प मुखार आसा, पूण वेंचणुकेक अजून चार म्हयने उरल्यात, देखून कोण जिखतलो तें खात्रीन सांगप शक्य ना. कमला हॅरिस भारतीय वंशाची आशिल्ल्यान भारतीय तशेंच आशियायी मतदार तिका मत दितले अशीय अपेक्षा आसा. तातूंत ती अध्यक्षीय वेंचणूक लढोवपी पयली काळी बायल. तिचो बापूय जमैकाचो. अशा कांय मुद्द्यांक लागून ही वेंचणूक अटीतटीची म्हणटात, तशी जातली, हातूंत दुबाव ना.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
