भांगरभूंय | प्रतिनिधी
सुदानांच्या बायलांची काळजाक घाय घालपी काणी
ओमदुर्मन, खबरां संस्था : झुजपिडेस्त सुदानांत (आफ्रिका) बायलांक आपल्या कुटुंबाक जेवण मेळोवपा खातीर सैनिकां कडेन लिंगीक संबंद दवरचे पडटात, अशी खबर ‘द गार्डियना’न दिल्या. ओमदुर्मन शारांतल्यान पळून गेल्ल्या 24 बायलांनी ही म्हायती दिली. तांणी सांगलें की, सैनिकां वांगडा संबंद दवरप होच एकमेव मार्ग. आमी आमकां विकून कुटुंबाची भूक भागोवपाक पयशे एकठांय करतात. आतां मेरेन आरएफएस सैनिकांनी 200 परस चड बायलो आनी चलयांचेर बलात्कार केल्यात, अशी खबर आसा.
‘शारभरांतल्या कारखान्यांत जंय अन्न सांठो आसता थंय हल्लो जाला. म्हजे आवय- बापूय दोगांय चड जाण्टीं आनी दुयेंत आसात. हांव म्हजे चलयेक जेवण सोदपाक केन्नाच भायर सरूंक दिना. हांव सैनिकां लागीं गेलीं आनी जेवण मेळोवपाचो हो एकूच मार्ग आशिल्लो – ते कारखान्याच्या वाठारांत सगळे कडेन आशिल्ले,’ अशें फाटल्या वर्सा मे म्हयन्यांत मांस प्रक्रिया करपी कारखान्यांत सैनिकां वांगडा लिंगीक संबंद दवरपाची जबरदस्ती केल्ले एके बायलेन सांगलें.
देशांत यादवी झुज सुरू जाले उपरांत रोखडेंच हल्लो सुरू जाल्ल्याचें सांगतात. ताका लागून देशांतल्या सैन्याक अर्द सैनिक रॅपिड सपोर्ट फोर्सेस (RFS) आड तोंड दिवचें पडलां. फाटल्या वर्सा 15 एप्रील सावन सुरू जाल्ल्या संघर्शाच्या कांय दिसां भितर सशस्त्र मनशांनी बलात्कार केल्ल्याच्यो खबरो आयिल्ल्यो.
सुदानांतल्या झुजांत हजारांनी लोकांक मरण आयलां आनी कांय अदमासा प्रमाण मरण आयिल्ल्याची संख्या देड लाखां मेरेन आसा. ह्या झुजाक लागून संवसारांतलें सगळ्यांत वायट विस्थापन संकश्ट निर्माण जालां. एक कोटी 10 लाखां परस चड लोक विस्थापीत जाल्यात. देशांत दुकळ पडूं येता.
आरएसएफ झुजाऱ्यांनी आपल्या नियंत्रणा खाला आशिल्ल्या वाठारांनी पद्दतशीरपणान लैंगीक अत्याचार केल्ल्याच्यो भिरांकूळ काणयो सांगपाक जायत्यो बायलो मुखार आयल्यात. लोकांनी सोडून दिल्ल्या घरांनी प्रवेश मेळोवपाच्या बदलाक सैनिकांनी लिंगीक संबंद दवरपाची मागणी केल्या, अशें बायलांनी सांगलें. ह्या घरांनी सामान आसा. तें चोरून विकपाचो यत्न जायते लोक करतात. तांतूंत बायलांय आसतात.
सैनिकां वांगडा संबंद दवरतकच रिकाम्या घरांतल्यान जेवण, रांदचे कुडीचीं उपकरणां आनी अत्तर घेवपाक मेळटा अशें एके बायलेन सांगलें. “हांवें जें भोगलें तें वर्णन करुंक जायना. दुस्मानाचेर पसून असो वेळ येवचो न्हय. हांवें फकत म्हज्या भुरग्यांक पोसपाक जाय म्हणून हें केलें.”
सैनिक बायलांक सोडून दिल्ल्या घरांनी हाडटात. थंय तांकां रांकेंत उब्यो करतात. मागीर सैनिक आपणाक आवडटा ती बायल घेवन वतात. केन्ना केन्ना बायलांचो आड्ड्यो मारपी आवाज येता, पूण आमी कांयच करूं शकनात, अशें एका रहिवाशान सांगलें.
एकदां एके बायलेन सैनिका कडेन संबंद दवरपाक न्हयकार दिलो. तेन्ना तांणी तिचे पांय लासले, अशें एके बायलेन सांगलें. 21 वर्सां पिरायेच्या हे तरणाटेन सांगलें की, जेवण आनी माल मेळोवपा खातीर घरां लुटपाक परवानगी दिवपाच्या बदलाक तिणें सैनिकां कडेन संबंद दवरलो. पूण तिणें परतून तशें करपाक न्हयकार दिलो, तेन्ना सैनिकांनी तिचे पांय लासले.
स्वता केन्नाच बायलेक मारपेट केल्ल्याचें न्हयकारपी एका सैनिकान आपल्या वांगड्यांक हें करतना पळयलां अशें सांगलें. “हें भयानक आसा. ह्या शारांतल्या पातकांचें प्रमाण केन्नाच माफ करपाक मेळना, इतलें आसा, अशें ताणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
