भांगरभूंय | प्रतिनिधी
दोन वर्सांत सगल्या सरकारी शाळांनी ‘एनईपी’ संबंदीत गरजेच्यो सुविधा उबारतले
पणजी ः राज्यांत पूर्व प्राथमीक, णववी आनी उच्च माध्यमीक हांचे खातीर नवे राष्ट्रीय शिक्षण धोरण चालीक लायलां. फुडल्या दोन वर्सांत सगल्या सरकारी शाळांनी ‘एनईपी’ संबंदीत गरजेच्यो सुविधा बांदतले. अनुदानीत संस्थांनी स्वताच्या खर्चान सुविधा बांदप गरजेचें अशें मुख्यमंत्री डॉ. प्रमोद सावंत हांणी सोमारा विधानसभा सभाघरांत उलयतना स्पश्ट केलें.
प्रस्न वर सत्रांत आमदार एल्टन डिकॉस्टा हांणी ‘एनईपी’ संबंदी प्रस्न मांडलो. राज्या सरकारान पूर्व प्राथमीक, णववी आनी उच्च माध्यमीक हांचे खातीर ‘एनईपी’ चालीक लावपाक सुरवात केल्या. पूण जायत्या शाळांनी ते खातीर गरजेच्यो सुविधा नात. अशे परिस्थितींत सरकार ‘एनईपी’ योग्य रितीन कशी चालीक लायतलें, आतां मेरेन ‘एनईपी’ चालीक लावपा खातीर सरकारान कसली तयारी केल्या अशें प्रस्न डिकॉस्टा हांणी विचारलें. ताचेर जाप दितना मुख्यमंत्र्यान सांगलें, पुराय देशांत गोंयान ‘एनईपी’ संबंदीं बरें काम केलां.
फावंडेशन पांवड्यार ‘एनईपी’ चालीक लावपा खातीर 94 मास्टर ट्रेनरांक प्रशिक्षण दिलें. ह्या मास्टर ट्रेनरांनी प्राथमीक शिक्षकां सयत आंगणवाडींत शिकोवपी तीन हजार शिक्षकांक प्रशिक्षण दिलां. आतां मेरेन सरकारान 720 संस्थांक ‘एनईपी’ चालीक लावपाक परवानगी दिल्या. णववी खातीर गोवा स्टेट स्कूल स्टँडर्ड असेसमेंट अँड अॅक्रिडेशन आनी जी स्कॉप अशीं दोन प्राधिकरणां स्थापन करपी गोंय देशांतलें पयलें राज्य आसा अशें मुख्यमंत्र्यान सांगलें.
‘एनईपी’ चालीक लावपा खातीर शंबर टक्के सुविधा शाळांनी उपलब्ध नात. सरकारी शाळांनी दर्जेदार शौचालय, रेस्टरुम, वर्ग तयार करप ही सरकाराची जापसालदारकी. जाल्यार अनुदानीत शाळांक सरकारा कडल्यान निधी मेळटा. देखून गरजेच्यो सुविधा उबारप ही तांची जापसालदारकी आसा अशेंय तांणी सांगलें. विरोधी पक्ष फुडारी युरी आलेमाव, आमदार कार्लुस फेरेरा आनी व्हेंझी व्हिएगश हांणीय ह्या वेळार प्रस्न उप्रासले.
गणित, विज्ञानाची पर्वरींत प्रयोगशाळा
‘एनईपी’ खातीर गरजेच्यो प्रयोगशाळा स्थापन करपा खातीर सरकारान अर्थसंकल्पांत 90 लाखांची तजवीज केल्ली. पूण प्रयोगशाळा स्थापन करिनासतना णववी खातीर ‘एनईपी’ चालीक लावपाक सुरवात कशी केली असो प्रस्न आमदार व्हेंझी विएगश हांणी मांडलो. ताचेर जाप दितना मुख्यमंत्र्यान सांगलें, पर्वरींतल्या एससीआरटीच्या इमारतीत गणित आनी विज्ञान ह्या दोन विशयांची प्रयोगशाळा सुरू जातली. प्रयोगशाळे खातीर चार कोटी रुपयांची तजवीज केल्या. तांतूतले 90 लाख रुपया मंजूर जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
