भांगरभूंय | प्रतिनिधी
कोरगांव, बातमीदार : आगरवाडो- चोपडें पंचायतीचे आयतारा जाल्ले ग्रामसभेंत चोपडें दोंगरावेल्या जमीनीचें रुपांतर करपाचो विशय बरोच गाजलो. थळाव्या लोकांक विस्वासात घेनासतना केल्ल्या जमीन रुपांतरा आड न्यायालयांत याचिका घालपाचो निर्णयूय ह्या वेळार एकमतान मान्य जालो. ह्या वेळार सरपंच सचिन राऊत हांणी आपूण नागरिकां वांगडा रावतलो अशें आश्वासन दिलें.
सरपंच राऊत हांचे अध्यक्षते खाला जाल्ले हे बसकेंक उपसरपंच शिल्पा राऊत, पंच भागीरथ गांवकार, ऍंथोनी फर्नांडिस, हेमंत चोपडेकार, संगीता नायक, दीपाली लिंगूडकार आनी पंचायत सचीव करिश्मा मोरजकार हाजीर आशिल्ले.
ह्या वेळार चोपडेंचे नागरीक संजीव गांवकार हांणी चोपडे दोंगरा माथ्यार आशिल्ल्या जमनीच्या प्रस्नाचेर उलयतना सांगलें, दोंगरावेलो 6 लाखां परस चड वाठार रुपांतरीत जाला. तांणी संबंदीत तपशील सादर केलो. हे विशीं थळाव्या पंचायतीक आनी नागरिकांक कसलीच कल्पना दिवंक ना वा हरकत घेवपाक फावो तो वेळूय दिवंक ना.
हे संबंदीं सरकारी राजपत्रांत 12 मार्च 24 दिसा सर्वेक्षण क्र. 17/1 त 60 हजार चौखण मीटर जमनीचें रुपांतर जाल्ल्याची नोंद आसा. आनी फुडें सर्वेक्षण क्रमांक 17/1 त 43 हजार 455 जमनीचें रुपांतर जाल्ल्याची नोंद आसा. हाचे भायर 13 जून दिसा उजवाडाक आयिल्ल्या राजपत्रांत सर्वेक्षण क्रमांक 10/1 त 3 लाख चौखण मीटर. 27 जून दिसाच्या राजपत्रांत 17/1 जमनीचें रुपांतर जालां पूण वाठार स्पश्ट केल्लो ना अशें नोंद जालां. सर्वेक्षण क्रमांक 17/1 प्रमाण 2021 वर्सा आरजीपीन आपत्कालीन सेवां खातीर जमीन राखून दवरल्या अशें नोंद आसा.
पर्यावरण संवेदनशील वाठारांत बांदकामां करुन ताचो चोपडें गांवाचेर वायट परिणाम जातलो. तशेंच ह्या जाग्यार बोरवेल खणल्या अशें तांणी सांगलें. आतां सावन रानवटी जनावरां वस्तींत प्रवेश करपाक लागल्यात. हालींच चोपडेंत बिबटो धरलो अशेंय तांणी सांगलें. तशेंच हे सुवातेर इमारती उबारल्यार गोंयां भायलो लोक हांगा येवन रावपाक लागतलो. कारण ते फ्लॅट गोंयकारांक परवडपा सारके नासतले. फुडाराक ह्या दोंगराचेर उदकाचो योग्य निचरो जावचो ना, आनी हाका लागून चोपडे गांवांत उदकाचो उणाव जातलो. हो प्रस्न गंभीरतायेन हाताळपा खातीर न्यायालयांत वचपाची तयारी करपाची सुचोवणी केली. हे विशीं बरीच चर्चा जाले उपरांत पंचायती वतीन नागरिकाचें निवेदन टीसीपी, थळावो आमदार, मुख्यमंत्री, खासदार हांकां दितले. हाचे खातीर निवेदन तयार करून नागरिकांच्यो सयो घेतल्यो आनी न्यायालयांत वचपाची तयारी केली.
ह्या वेळार सरपंच सचिन राऊत हांणी नागरिकांचें म्हणणें आयकून पंचायत न्यायालयांत अपील दाखल करतले अशें स्पश्ट आश्वासन दिलें. संजीव गांवकार, विवेक गांवकार, अमोल राऊत, नरेश चोपडेकार, तरणी गांवकार, अनिल शेट्ये, पीटर फर्नांडीस, सीताराम परब, उल्हास चोपडेकार आदी हांणी ह्या विशयाचेर जाल्ले चर्चेंत वांटो घेतलो.
हाचे भायर हे बसकेंत सोपो कर वसुली, घाणयारे उदकाची वेवस्था, कोयर वेवस्थापन, रेंव काडप, पायवाट, सभाघर, कोंडवाडो तशेंच हेर उदरगतीच्या कामां विशीं चर्चा जाली. ह्या वेळार थळावो आमदार जीत आरोलकार हांचे वांगडा ग्रामसभेची बसका घेवपाचे थारायले.
सुरवेक पंचायती वतीन सादर केल्लो वट्ट खर्च तशेंच अदमास पत्रकाक मान्यताय दिली. सरपंच राऊत हांणी येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
