भांगरभूंय | प्रतिनिधी
धोक्याची झाडां कापपाचे उपजिल्लोधिकाऱ्यांक आदेश
पणजी ः राज्यांतल्या लोक प्रतिनिधींनी आपल्या वाठारांतल्या धोक्याच्या झाडांची वा तांच्या फांट्यांची म्हायती बेगोबेग उपजिल्लोधिकाऱ्यांक दिवची. उपजिल्लोधिकारी अशीं झाडां वा तांचे फांट्याची पळोवणी करुन ती कापपाचो निर्णय घेतले अशें मुख्यमंत्री डॉ. प्रमोद सावंत हांणी आयज विधानसभा सभाघरांत उलयतना स्पश्ट केले.
फाटल्या कांय दिसां सावन राज्यांत पडपी उटंगाराच्या वादळी पावसाक लागून वेगवेगळ्या वाठारांनी झाडां पडपाच्यो घडणुको घडटात. अशी झाडां वा तांचे फांटे थळाव्या लोकांच्या घरांचेर आनी वाहनांचेर पडपाक लागून तांकां लाखांनी रुपया लुकसाण जाता. आयतारा राजधानी पणजेच्या चर्च स्क्वेअर वाठारांत पावसाक लागून झाड पडून आरती गोंड ह्या 19 वर्सां पिरायेचे तरणाटेक मरण आयलें. हाचे उपरांत धोक्याची आशिल्ली झाडां वा फांटे कापून उडोवपाचो आदेश उपजिल्हाधिकाऱ्यांक दिला. देखून लोक प्रतिनिधींनी आपल्या वाठारांतल्या धोक्याची झाडां आनी फांट्यां विशीं म्हायती बेगोबेग उपजिल्होधिकाऱ्यांक दिवची अशें आवाहन मुख्यमंत्री डॉ. सावंत हांणी केलें.
आरती गोंडाच्या कुटुंबाक 4 लाखांची मजत
काल पणजेच्या चर्च स्क्वेअर वाठारांत झाड पडून मरण आयिल्ल्या आरती गोंड (19) हिच्या कुटुंबाक सरकारा कडल्यान 4 लाखांची अर्थीक मजत दिवपाची घोशणा केल्या. मुख्यमंत्री डॉ. प्रमोद सावंत हांणी आयज विधानसभा सभाघरांत उलयतना ही म्हायती दिली. आयतारा सकाळीं पावसाक लागून उमथून पडिल्ल्या झाडां पोंदा रामनगर-बेतीची आरती गोंड ही तरणाटी चिड्डली. 108 एम्ब्युलन्साच्या मजतीन तिका उपचारा खातीर जीएमसींत दाखल केल्ली. पूण थंय उपचार चालू आसतना सांज वेळार तिका मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
