भांगरभूंय | प्रतिनिधी
मडगांवः दक्षीण गोंयांत सनबर्न येतलो अशें आयोजकांनी जाहीर करताच आतां दक्षीण गोंयांतल्या साश्टी वाठारांतल्यान ह्या महोत्सवाक व्हड प्रमाणार विरोध करपाक सुरवात जाल्या. सनबर्न हो संगीत महोत्सव न्हय जाल्यार ड्रग्स महोत्सव अशें सांगून लोकांनी निदर्शना केलीं. आतां साश्टींतल्या विवीध ग्रामसभांतल्यान सनबर्नाक विरोध आशिल्ल्याचे थाराव संमत करतात.
दक्षीण गोंयांतल्या सामान्य लोकूय आतां सनबर्नाक विरोध करपाक लागल्यात. हे आदीं अॅड. राधाराव ग्रासियस हांणी सांगिल्लें, सनबर्न महोत्सवाक दक्षीण गोंयांतल्यान धांवडावपाक थळावे लोक एकवटीत आसात. सनबर्न आयोजीत करून सरकारान लोकांक रस्त्यार देंवपाक लावचें न्हय, अशीय तांणी शिटकावणी दिल्ली.
लोकांनी लेगीत उत्स्फूर्त तरेन सोशल मिडियाचेर भावनां उक्तावन सनबर्नाक विरोध केला. ते उपरांत जिल्होधिकारी कार्यालया भायर दक्षीण गोंयांतल्या लोकांनी एकठांय येवन आंदोलन लेगीत केल्लें. ड्रग्सा कडेन संबंद आशिल्लो सनबर्न महोत्सव नाका, अशें तांणी ह्या वेळार सांगिल्लें. ह्या वेळार आम आदमी पक्षाच्या फुडाऱ्यांनी ह्या आंदोलनाक तेंको दिल्लो. आतां साश्टी वाठारांतल्यान सनबर्न महोत्सवाक विरोध वाडत आशिल्ल्यान ग्रामसभांतल्या थारावांतल्यान दिसून येता.
फाटल्या सप्तकांत कुडटरी ग्रामसभेंत लेगीत सनबर्न महोत्सवाच्या विरोधांत काँग्रेस फुडारी मरिनो रिलेबो हांणी मत मांडिल्लें आनी तसो थाराव लेलगीत ग्रामसभेंत संमत जालो.
ह्या वेळार बसकेक हाजीर आशिल्ले आयडीसीचे अध्यक्ष तशेंच आमदार आलेक्स रेजिनाल्ड हांचे कडेन रिबेलो हांचो वाद लेगीत जालो. आयडीसीचे अध्यक्ष रेजिनाल्ड हांचे कडेन महोत्सवा संबंदान स्पश्टीकरण मागिल्लें. अजून लेगीत रेजिनाल्ड हांणी सनबर्न दक्षीण गोंयांत जावचो ना, अशें स्पश्टपणान सांगूंक ना. आयतारा बाणावले जाल्ले ग्रामसभेंत लोकांनी सनबर्न महोत्सव दक्षीण गोंयांत आयोजीत करचो न्हय, अश्या थारावाक संमती दिली. तशेंच तळावली, चांदर, वेळ्ळी ह्या ग्रामसभांनी लेगीत लोकांनी एकवटान सनबर्ना आड थाराव संमत केलो. जाल्यार आंबेली ग्रामसभेंत लेगीत सनबर्नाचो विशय आयलो. तेन्ना संगीत महोत्सवाक विरोध ना, पूण त्या संगीत महोत्सवाच्या नांवान ड्रग्स आनी हेर अवैध गजालींक लागून युवा पिळगेक धोको आशिल्ल्याचें सांगून सनबर्ना आड थाराव संमत केलो.
दक्षीण गोंय काँग्रेसीचोय विरोध
सनबर्न महोत्सवांत हे आदीं ड्रग्स घेतिल्ल्यान पर्यटकांक मरण आयिल्ल्याच्यो देखी आसात. ह्याच कारणां खातीर उत्तर गोयांतल्या लोकांनी ह्या महोत्सवाक विरोध केला. ताका लागून आतां हो महोत्सव शांत अश्या दक्षीण गोंयांत हाडपाचो यत्न चल्ला. बूक माय शो हाचेर दक्षीण गोंयांत सनबर्न जातलो, अशें सांगून आयोजकांनी तिकेट विक्री सुरू केल्या. सरकारान हाचेर स्पश्टीकरण दिवपाची गरज आसा, अशें दक्षीण गोंय काँग्रेस जिल्हो अध्यक्ष सावियो डिसिल्वा हांणी सांगलें.
ड्रग्स नासल्यार कोणूच येवचो नाः चर्चील आलेमांव
सनबर्न महोत्सव हो फक्त ड्रग्ज खरेदी- विक्री खातिरूच करतात. उत्तर गोंयांतल्या सनबर्न महोत्सवा वेळार खूब जाणांक ड्रग्ज घेवन मरण आयिल्ल्याच्यो देखी आसात. ड्रग्साचेर बंदी घातल्यार ह्या महोत्सवाक कोणूच येवचो ना, हें मुख्यमंत्री आनी हेर मंत्र्यांनी समजून घेवपाची गरज आसा. हो महोत्सव फक्त ड्रग्सा खातीर देशांतल्या हेर वाठारांनी जायनासतना गोंयांतूच करपाचो आयोजकांचो हट्ट आसता. तेच खातीर युवा पिळगेचो फुडार मतींत दवरून सनबर्नाक विरोध आसा, अशें आदले मंत्री चर्चील आलेमांव हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
