भांगरभूंय | प्रतिनिधी
अाळंदी सावन संत ज्ञानेश्वरांच्या पालखे वांगडा पुणे, सासवड, जेजुरी, लोणंद, फलटण, नातेपुते, माळशिरास, वेळापूर, शेगांव, वाखरी ते पंढरपूर वचपी वारकरी आनी देहू सावन भायर सरील्ल्या संत तुकारामाच्या पालखेचो मेळामेळ वखारी हांगासर जाता. ह्या भायर एकूण ४३ पालखी विंगड विंगड वाठारातल्यान पंढरपूर वचूक भायर सरतात. वर्सातल्यान एक फावट जावपी हो सुवाळो दोळे दिपकावणो आसता. हें दृश्य अणभवूक साबार लोक जमतात.
नामनेच्या त्या फोटोग्राफरांक लोकेशन [थळस्थिती] दाखोवन दिवपी गुगल मेपाची कुरु (location pin) आनी विठ्ठलाच्या कपाळावेलो तो तिबो सदांच आकर्शून घेतालो. तो चित्तालो दोगा भितर इतले साम्य कशें? निकतो असो योगा योग आसुकू शकना. हालीच आशिया खंडाचो बेस्ट फोटोग्राफर म्हण एक नामनेच्या जपानी कंपनीचो लेटेस्ट डीजीटल कँमेरा ताका बक्षीस म्हण मेळील्लो. ह्या सुवाळ्यांची संसारभरल्या लोकांक वळख जावची ह्या निस्चेवान ल्हानशे फिल्म करपाच्या तयारेन, सदच्यो गरजेच्यो वसती आनी कँमेरा आपल्या बॅगेंत भरून तो वारीच्या वाटेक लागलो.
पंढरपूरच्या त्या वाटेर तो २७ ते २८ वर्साचो जुवान वारकरी तांच्या मदल्या जाणट्यांक जात-पात विसरून उदक, जेवण दिवप, तांचे पाय चेपून दिवप, तेल लावन पाय चोळप, दुयेंतीक वखदां दिवप असल्या कामानी गुल्ल जाल्लो. तो खंयचो आनी कित्या पासत हें सगळे करता काय? ताच्या तोंडावेले भाव नियाळत तर ते कळूंक जाय अशी ताची लेगीत अपेक्षा आशिल्ली अशें दीस नाशिल्ले. वाटभर विठ्ठलाच्या गजरांत वारकरी आनी तांच्या सेवेक तो चलताले. हय, होच म्हज्या फिल्माचो हीरो. फोटोग्राफरान त्या तरणाटयाक नकळत आपणेच थारायले. सेवा म्हळ्यार किते आनी ती कशी करू येता ही देख दिवपी ताचे सगळे प्रसंग ताणे केनडीड [मनमेकळें] रितीन फोटोशूट करून कँमेरांत एकठांयले. वीस दिस तो त्या हिरोचे अशें विंगड विंगड खिंण शूट करीत भोंवलो. घरा परतल्या उपरांत ताणे कँमेरातले सगळे फोटो आपल्या लेपटॉपार डाउनलोड करूंक दवरले. वीस दिसाचो शीण निवळांवक फ्रेश जावन ताणे फ्रीजातल्यान थंड बियेरीची बाटली काडली. तो मेरेन सगळे फोटो डाउनलोड जाल्ले. एडिट [संपादन] सुरू करचे आदी ताणें परत सगळ्या फोटूर नदर मारली आनी तो एकदम काचाबूल जालो. डाउनलोड जाल्ल्या त्या सगळ्या फोटुनी ताचो तो हीरो खंयच दिस नाशिल्लो. दिसताले ते फक्त ताणे सेवा केल्ले वारकरी. अशें कशें जावं येता. जेन्ना तो फोटू काडी त्या वेळार तो आपलो आपलो कँमेरा सदाच तपासतालो. त्या वेळार सगळे समा आशिल्ले. आताच अशें कशें जाव येता. कॅमेरा आनी लेपटॉपावेली जीतली तांत्रीक उपयोगितेची साधना आशिल्ली त्या सगळ्यांचो उपेग करून लेगीत कांयच बदल जालो ना.
पंढरपूरच्या दिशेन नजर मारीत ताणे म्हळे “ विठ्ठला, अडिल्ल्या नडिल्ल्यांची सेवा करूंक कसलीच थळस्थिती लागना, तुज्या कपाळावेलो तो तिबो हेच दाखयता हे सांगूंक, तूं रे कित्याक वारकरी जालो “
दादा हेगडे
9518942298
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
