भांगरभूंय | प्रतिनिधी
भांगरभूंयचेर एक बातमी वाचली. कवी सर्गेस्त नारायण सुर्वे हांच्या नेरळ (रायगड) गांवांतल्या घरांत चोरी जाल्ल्याची. चोराक तें घर एका नामनेच्या कवीचें अशें कळटकच ताणें चोरून व्हेल्लें सगळें सामान परत हाडून दवरलें आनी बरोबर एक चिटूय दवरली.
चोरी करप वायट. चोर ताच्या समर्थनांत कितल्योय सबबी दिवं, चोरी करपाचें समर्थन जावपाक शकना. पूण तरी ह्या चोरान जें केलें ताचेर सगल्यांचें लक्ष ओडून घेतलें. हो चोर साहित्याचो चाहतो काय कवी सुर्वे हांचो चाहतो हें कळपाक मार्ग ना. पूण ह्या चोरान आपल्या ह्या कृत्यान समेस्त लेखक समाजाक तांच्या जापसालदारकेची जाणीव करून दिल्या.
हांगां कांय लेखकूच साहित्य चोरपाचें काम करतात. लेखकाच्या घरांत चोरी करप ना अशें चोराक दिसता, थंय लेखकाची सगळ्यांत व्हड संपत, म्हणल्यार ताचें साहित्य चोरून आपल्या नांवार खपोवपाक स्वताक लेखक म्हुणटल्यांक कांयच दिसना हें दुर्दैव.
पुरस्कार मेळटकच कांय लेखक प्रतिक्रिया दितना सांगतात, ‘आतां जापसालदारकी वाडल्या’. मुळांत लेखक आसप हीच मोठी जापसालदारकी. ती पुराय करपाक लेखकाक पुरस्कार मेळूंक जाय म्हूण ना.
म्हाका याद जाता, एक फावट म्हाका काश्मिरी लेखक जमा अजुरदा हांणी साहित्यीक कार्यावळीचें आपोवणें धाडलें. तें वाचतकच डॉ. अजुरदा हे काश्मिरी विद्यापिठाचे डीन म्हूण कळ्ळें. तेन्ना हांवें तांकां सांगलें, ‘ते शिक्षणशाखाध्यक्ष हें म्हाका खबर नाशिल्लें’. तांकां हांव फकत लेखक म्हूण वळखतालें. तेन्ना तांणी जाप दिली, ‘शिक्षणशाखाध्यक्ष आसप हें व्हडलें न्हय, लेखक आसप व्हडलें. कारणा शिक्षणशाखाध्यक्षाक शिश्टाचार लागता. लेखक मुक्त आसता,’
खरें. खरो लेखक हो मुक्त आसता. ताका कसलेंच बंदन आसना. आसपाक जायना. तो जर वेगवेगळ्या बंदनांनी बांदिल्लो आसत जाल्यार लेखक म्हूण कसो प्रामाणीक आसतलो? मुक्त आसप हेंच लेखकाचें शस्त्र.
लेखकाचें काम कितें? फकत सर्वश्रेश्ट साहित्य निर्माण करप? ताचे आशिकुशीक जें घडटा वा समाजांत जें घडटा ताचें कडेन ताका कांयच देणें घेणें ना?
कांय दिसां आदीं एक लेख वाचिल्लो. टॉलस्टॉय हांणी शेक्सपियराच्या साहित्याचेर केल्ली समिक्षा. शेक्सपियर एक संवसारभर गाजिल्लो नाटककार. ताचें नांव आयकुनाशिल्लो क्वचीतच कोणूय शिक्षीत मनीस मेळटलो. दुर्दैवान टॉलस्टॉयापरस शेक्सपियराक सादारण लोक चड वळखतात. जेन्ना टॉलस्टॉया सारको सर्वश्रेश्ट लेखक, विचारवंत एखाद्याचेर टिका करता, ताची दखल घेवचीच पडटा.
टॉलस्टॉय म्हणटा, ‘शेक्सपियर हो एक उथळ लेखक. ताका समाजीक आनी धर्मीक प्रस्नांत रस ना. सोळाव्या शेकड्यांतलें राजकारण, जाणें नितीमुल्ल्यां पांयांपोंदां माड्डिलीं, अन्याय आनी समाजीक भेदभाव हांचे विशीं तो कसलेच प्रस्न उपस्थित करिना. ताका नैतीक मुल्यां नात’.
लेख कितलोय फामाद आसूं, कितलोय प्रतिभासंपन्न आसूं, व्हड पुरस्कारांनी सन्मानीत आसूं. ताणें वैचारीक भुमिका घेवपाकूच जाय. आपल्या आशिकुशीक जें चल्लां ताचे विशीं मत मांडपाकूच जाय. लेखकाच्यो कांय नैतीक आनी समाजीक जापसालदारक्यो आसतात. आपल्या आशिकुशीक, राज्यांत, देशां जें चल्लांतें तठस्तपणान मांडप. चुकीच्या गजालींक चूक म्हणप इतली धिटाय लेखका कडेन आसपाकूच जाय. दरेकल्यान दरेका टप्प्यार, येता ते परिस्थितींत आपली भुमिका घेवपाकूच जाय. पूण बाकीच्यांक एखादवेळ माफ आसा. लेखकाक माफ ना.
संपदा कुंकळकार
9850149319
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
