विनोदाचो सरदार : जसपाल भट्टी

भांगरभूंय | प्रतिनिधी

दूरदर्शनाच्या युगांत जसपाल भट्टी हो एकलोच कलाकार जो लोकांच्या तोंडार हांसो हाडटालो. देखून सामान्य मनशाक तो आपलो कसो दिसतालो.

समाजीक राजकी वेवस्थेचेर मजेशीर विनोद करुन आपले विचार व्यक्त करपी सरदार म्हणल्यार जसपाल भट्टी. तांची विनोद करपाची शैली वेगळी आशिल्ली. मुखामळार कसलोच हावभाव करनासतना तो फक्त उलोवन प्रेक्षकांक हांसयतालो. आयच्या काळांत जेन्ना  विनोदी कलाकारां विशीं उलोवप जाता तेन्ना सगळ्यांच्या मनांत एक नांव येता. तें कपिल शर्मा. पूण एका तेंपार विनोद करपा नदरेन जसपाल भट्टी कपिल शर्मा परस धा पावलां फुडें आशिल्लो. तो वेवसायान इंजिनिअर, लेखक, दिग्दर्शक आनी व्यंगचित्रकार आशिल्लो 

जसपाल तागेली दूरदर्शन माळ ‘फ्लॉप शो’क लागून सुपरहिट जाल्लो. ऑफिस जिणे सावन राजकारण मेरेन सगळ्या गजालींचेर खूब व्यंग्यांनी भरिल्लो ‘फ्लॉप शो’ वरवीं तो मन रिजवणे वांगडाच समजाक जागृतायूय करतालो. हांसत- हांसत जसपाल भट्टी व्यंग्यांतल्यान खूब खोल गजाली सांगतालो, ज्यो मुखार आशिल्ल्या प्रेक्षकांक वायट दिसनाशिल्ल्यो. 90 च्या दशकांत सुरू जाल्ल्या ‘फ्लॉप शो’क बऱ्या फिल्मांक लेगीत मेळूंक नाशिल्लें यश मेळ्ळें. 

उपरांत ‘उल्टा पुल्टा’ आनी ‘नॉनसेन्स प्रायव्हेट लिमिटेड’ सारके विनोद आनी व्यंग्यान भरिल्ले शो करून ताणें देशांत आनी संवसारांत नामना मेळयली. दूरदर्शनाच्या युगांत जसपाल भट्टी हो एकलोच कलाकार जो लोकांच्या तोंडार हांसो हाडटालो. देखून सामान्य मनशाक तो आपलो कसो दिसतालो आनी वेवस्थे कडेन संबंदीत आशिल्ल्या समस्यांचेर व्यंग्यांतल्यान आपलीं मतां उक्तावपाचो अणभव ताका पयलींच आशिल्लो, 

पूण जेन्ना तो आपली शैली घेवन टिव्ही पडद्याचेर आयलो तेन्ना हो विनोदी सरदार लोकांच्या काळजाचेर राज्य करपाक लागलो. टिव्ही माळांनी येवचे, पयलीं जसपाल भट्टीन ‘द ट्रिब्यून’ खातीर व्यंगचित्रांय काडिल्ली. हाचे भायर ताणें जायते चित्रपट दिग्दर्शीत केल्यात. रस्तो नाटकांतल्यान समाजीक प्रस्नूय मांडले. जायत्या सुवातींनी आपली  छाप सोडून जसपाल भट्टी मुंबय गेलो. तशेंच ‘आ अब लौट चलें’, ‘जानम समझा करो’ ह्या सारक्या जायत्या बॉलिवूड फिल्मांनी ताणें लोकांक हांसयले. 

जसपाल भट्टीचो जल्म 3 मार्च 1955 दिसा अमृतसरांत जालो. जसपाल भट्टीन पंजाब अभियांत्रिकी महाविद्यालयांतल्यान विद्युत अभियांत्रिकी पदवी मेळयली. कॉलेजीच्या काळांत ताणें  ‘नॉनसेन्स क्लबा’ वरवी रस्तो नाटकां करुन नामना मेळयली. ताणें चडशा नाटकांनी भ्रश्टाचार आनी राजकारण्यांची फकाणां विनोदी पद्दतीन साकार केल्लीं, ताका  लागून लोकांचो बरो प्रतिसाद मेळ्ळो. तागेल्या लोकप्रियतेचें कारण म्हळ्यार ताणें मध्यमवर्गाचे दिसपट्टे प्रस्न मनोरंजक पद्दतीन मांडले.

दूरदर्शनाचेर आपले कार्यक्रम सादर करचे पयलीं तो चंडीगढांतल्यान उजवाडाक येवपी ‘द ट्रिब्यून’ ह्या दिसाळ्याचो व्यंगचित्रकार आशिल्लो. पंजाब पुलिसांचेर काडिल्ले खर व्यंग्य चित्रांतल्यान ‘महौल ठीक है’ ताच्या  पयल्याच दिग्दर्शनाक बरीच लोकप्रियता मेळ्ळी. ताणें ‘फना’ ह्या चित्रपटांत गुड सिंगाची भुमिका केल्ली. ‘जिजाजी’ ह्या पंजाबी विनोदी चित्रपटांतय ताणें अभिनय केला. जसपाल आनी ताची घरकान्न सवितानय 2008 वर्सा ‘नच बलिये’ ह्या रियलिटी शोंत वांटो घेतलो आनी आपल्या नाचान आनी विनोदान प्रेक्षकांचें मनोरंजन केलें. फ्लॉप शो’ ही सामक्या उण्या बजेटांतली टिव्ही माळ मध्यमवर्गीय लोकांच्या समस्यांक विशिश्टतायेन उबारपा खातीर आयज लेगीत याद जाता. जसपाल भट्टीची बायल सविता भट्टी ही ह्या शोची निर्मातीच न्हय, तर ताच्या सगळ्या एपिसोडांनी तिणें ताचे बायलेची भुमिकाय केल्ली. ल्हान पडद्याचेर आपलो शो येसस्वी जाले उपरांत भट्टी हिंदी आनी पंजाबी फिल्मांनी कामां केलीं. भट्टी जायत्या रियलिटी शोंत दिसलो. ‘कॉमेडी का किंग कौन’ हातूंत जसपाल अभिनेत्री दिव्या दत्ता वांगडा सह- निर्णायक आशिल्लो.

‘नच बलिये’ ह्या नाचपाचे सर्तीचें  टिव्ही माळयेत तो आपले बायले वांगडा आपली नाचाची कुशळटाय दाखोवन दितना दिसलो. मोहालींत ताणें स्वताची प्रशिक्षण शाळा स्थापन केली आनी तिका ‘जोक फॅक्टरी’ अशें नांव दिलें. थंयच ताची ‘मॅड आर्ट्स’ एनीमेशन शाळा आसा, थंय ताणें ‘थॅंक यू जिजाजी’ ही 52 भागांची विनोदी मालिकाय तयार केल्ली. भ्रूणहत्या विशीं एनिमेशन फिल्म तयार केलें आनी ताका वन टेक मिडियान आयोजीत केल्ल्या ‘ॲडव्हांटेज इंडिया’ ह्या सिनेमांत दुसरें इनाम फावो जालें. 

जसपाल भट्टीन पॉवर कट (2012), मौसम (2011), हम तुम शबाना, चक दे फट्टे, एक द पॉवर ऑफ़ लव (2009), फ़ना (2006), कुछ मीठा हो जाये (2005), कुछ ना कहो (2003), तुझे मेरी कसम (2003), जानी दुश्मन (2006), कोई मेरे दिल से पूछे (2006), शक्ती (2002), ये है जलवा (2002), हमारा दिल आपके पास है (2002), खौफ़ (2002), जानम समझा करो (1999), आ अब लौट चलें (1999) ह्या सिनेमांनी भूमिका केल्यात.

जसपल भट्टीक ताच्या ‘पावर कट’ फिल्माच्या प्रचारा खातीर आपल्या पंगडा वांगडा भथिंडा सावन जालंधरक वतालो. वाटेर ताचे मोटारीक 

25 ऑक्टोबर 2012 दिसा मध्यानरातीं सुमार 3 वरांचेर जालंधरांतल्या शाहकोटा लागसार रस्त्या अपघातांत ताका मरण आयलें. ताचो पूत जसराजाचो ‘पावर कट’ सिनेमा प्रदर्शीत जावचे फकत एक दीस आदीं हो अपघात जालो. ताच्या फिल्माची नायिका आनी पीआरओ नवीन जोशी जखमी जालीं. 2013 वर्सा ताका भारताचो तिसरो सगळ्यांत व्हडलो नागरी पुरस्कार ‘पद्मभूषण’ (मरण उपरांत) फावो जालो. जसपाल भट्टी आयज  नासलो तरी ताचे प्रतिमा आनी प्रतिभेची याद ताच्या फॅन्सांच्या काळजांत अजूनय आसा.

——————————————-

सुदिन वि. कुर्डीकार