भांगरभूंय | प्रतिनिधी
पदवी जाल्ले 23,913, पदव्युत्तर 6,335 बेकार
पणजी: गोंयांतल्या सुशिक्षतांचे बेरोजगारींत व्हड प्रमाणांत वाड जाल्या. रोजगार विनियम केंद्रांत 30 जून मेरेन पदवी जाल्ले 23,913, पदव्युत्तर शिक्षण घेतिल्ले 6,335 जाल्यार पीएचडी जाल्ल्या 43 जाणांनी नोंदणी केल्या. आमदार जीत आरोलकार हांणी विधानसभेंत विचारिल्ल्या लेखी प्रस्नाक कामगार मंत्री बाबूश मोंसेरात हांणी दिल्ले जापेंतल्यान ही आंकडेवारी मुखार आयल्या.
राज्यांतल्या बेरोजगारीचो दर कितलो आसा, ह्या प्रस्नाक कामगार खातें बेरोजगारीचो दर मेजत नाशिल्ल्याचें मंत्री मोंसेरात हांणी म्हणलें. बेरोजगारी उणी करपा खातीर सरकारान कसले यत्न केले असोय प्रस्न आमदार आरोलकार हांणी विचारिल्लो. ताचेर बेरोजगारांक नोकऱ्यांची संद उपलब्ध करून दिवपा खातीर राज्य सरकारा कडल्यान सकारात्मक पावलां उबारतात. विवीध खाजगी कंपनीं कडेन समजिकायेची कबलात करून रोजगार मेळाव्यांचें आयोजन करतात. तरणाटे, तरणाट्यो हांकां करियरा विशीं मार्गदर्शन करून तांचें समुपदेशनूय करतात. तशेंच तांकां विवीध कंपनींनी नोकरीच्यो संदी मेळच्यो हे खातीर कुशळटाय विकास कार्यावळ सुरू केल्या. सर्त परिक्षा, बँकींग परिक्षां विशीं मार्गदर्शन करतात. कंपनींच्या मागणी प्रमाण तांकां कुशळटाय कर्मचारी दितात अशेंय मंत्री मोंसेरात हांणी जापेंतल्यान नमूद केलें.
नोंदणी जाल्ल्यांची शिक्षण संख्या
धावी 13,439, बारावी 25,173, धावी उपरांत डिप्लोमा 963, बारावी उपरांत डिप्लोमा 2,519, पदवी, 23,913, आयटीआय 6,727, पीएचडी 43, पदव्युत्तर शिक्षण 6,335, सवी मेरेन 1,058, णवी मेरेन 6,606, अशिक्षीत 494
रोजगार विनिमय केंद्रांत नोंदणी केली म्हणल्यार संबंदीत व्यक्ती बेरोजगार आसा अशें ना. ताका लागून रोजगार विनिमय केंद्रांत नोंदणी जाल्ले संख्ये वेल्यान राज्याचो बेरोजगारी दर मेजूंक येना अशेंय मंत्री बाबूश मोंसेरात हांणी जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
