गोंयांत रोजांचें आनी जायांचें उत्पादन धादोसकायेचें

भांगरभूंय | प्रतिनिधी

शेतकी मंत्री रवी नायक हांची विधानसभेंत लेखी जाप

पणजीः गोंयचीं फुलां रोजां आनी जायो हांचें धादोसकायेचें उत्पादन गोंयात जाता. पूण तांका कितलो प्रतिसाद मेळटा हाचेर स्पश्टीकरण कांयचा ना. ते भायर भायल्या राज्यांतल्यान येवपी रोजां परस लोक गोंयच्या रोजांक पसंदी दितात काय ना हाचेरूय कसलेंच स्पश्टीकरण ना.

विधानसभेंत लेखी जापेंत शेतकी मंत्री रवी नायक हांणी सांगलें की गोंयांत रोजांचें उत्पादन 179.2 टन इतलें जाता. तशेंच 266 शेतकार 27.546 हॅक्टर जमनीचेर रोजांची लागवड करतात. तशेंच दसऱ्यांक भायल्या राज्यांतल्यान कितल्या प्रमाणांत रोजांची फुलां गोंयांत येतात असो प्रस्न विचारल्यार शेतकी संचालनालया कडेन हाचो डेटा ना अशी जाप दिली.

दसऱ्यांक भायल्या राज्यांतल्यान गोंयांत रोजांची फुलां येतात. देखून थळाव्या शेतकारांक खूबशे लुकसाण जाता हाची जाणीव सरकाराक आसा? आसा जाल्यार गोंययांत रोजां लावपी शेतकार आसात तांचे हीत राखपा खातीर कसली पावलां उबारल्यांत अशे प्रस्न विचारले. आतां मेरेन भायल्या राज्यांतल्यान येवपी रोजांक लागून आमची रोजां खपनात अशी एकूय कागाळ थळाव्या रोजांच्या शेतकारा कडल्यान येवंक ना अशी जाप दिल्या.

जाल्यार गोंयात 18,308 कील जायांचें उत्पन्न जाता. 358 शेतकार 73 हॅक्टर जमनींत जायांची लागवड करतात. पूण म्हाड्डोळा जायांचेर बिल्डर लॉबिची नदर पडल्या आनी ह्या मळ्यांक उजो लागपाच्यो घडणुको आतां घडपाक लागल्यात. देखून जायांचें उत्पादनांक राखण दिवपा खातीर सरकारान कसलीं पावलां उबारल्यांत असो प्रस्न विचारलो.

हाचेर जाप दितना रवी नायक हांणी सांगलें सबसीडीच्या रुपांत अर्थीक सहाय्य दिवन सरकार जायांचे लागवडीक प्रोत्साहन दिता. नवे सुवातेंत उक्ती लागवड करपा खातीर फुलां खातीर दर हॅक्ट 75 टक्के सहाय्य दिता. जाची मर्यादा रु. 75,000 आसा. तशेंच वंय मारपा खातीर 75 टक्के सहाय्य मेळटा जाची मर्यादा 2 लाख आसा. तशेंच शिंपणावळ सुविधे खातीर 75 ते 90 टक्के सहाय्य मेळटा, अशी जाप नायक हांणी दिली.