भांगरभूंय | प्रतिनिधी
मेस्त आनी माकोड
एका रानांत मेस्त लाकडां तोडपाक वतालो. सदांच तो रानांतल्यान लाकडां हाडून बाजारांत विकतालो. मेस्त खूब गरीब आसलो. रानांतल्यान लाकडां हाडून तीं बाजारांत विकून तो आपलें आनी आपल्या कुटुंबाचें पोट भरतालो. मेस्त ज्या रानांत लाकडां तोडपाक वतालो त्या रानांत खूब माकोड आशिल्ले. ते सगळे त्या मेस्ताक वळखताले. मेस्त सद्दां सकाळीं त्या रानांत येतालो आनी दनपरां जेवपा खातीर घरा वतालो. जेवन जालें काय तो परत रानांत येतालो आनी कांय वेळ लाकडां कापून तीं सगळीं लाकडां तो सांजवेळार बाजारांत व्हरून विकतालो.
मेस्त सद्दां येवन लाकडां कापता आनी तीं फाटीर मारून व्हरता हें पळोवन थंय आशिल्ल्या सगळ्या माकडांक मजाच दिसताली.
एक दीस कितें जाता, सदचे भशेन मेस्त दनपरां जेवणा खातीर घरा वता. तो घरा वतना त्या रानांतले सगळे माकड पळयतात. त्या माकडां मदलो एकलो माकड मात्सो मस्तो आसता. मेस्त जेवणाक गेला तें पळोवन तो माकड ताचीं फकांडां करपाचें थारायता. माकड मेस्तान कुराड लायिल्ल्या झाडा कडेन येता आनी थंय लायिल्ली पाचर (पाचर म्हळ्यार लांकूड बी फोडटना मदीं घातिल्ली कापटी. हाका पाचरें अशेंय म्हणटात) व्हरून लिपयतलो म्हणून तो ती काडपाचो यत्न करता. मात ती घट्ट बशिल्ल्यान काडप ताका शक्य जायना. तो यत्न करून करून थकता.
इतल्यान थंय मेस्त येता तो त्या माकडाक दिसता. मेस्ताक पळोवन माकोड बरोच भियेता. तो सामको आबूज जाता. ताका कितें करचें तें कळना. तो थंयच्यान पळ काडपाचो यत्न करता. मात ताची शेंपडी लांकडा मदीं फारवता आनी ताका थंयच्यान पळपाक मेळना. माकोड सामको मेस्ताचेे तावडेंत सांपडटा.
मेस्त माकडा म्हर्यांत पावता. मेस्ताक माकडाक पळयना फुडें सगळो प्रकार समजता. ताका माकडाचो राग येता आनी तो ताका बरोच बडयता. माकडाक स्वताच केल्ल्या मुर्खपणांचो पश्चाताप जाता आनी तो थंयच्यान पळटा.
देख: केन्नाच दुसर्यांच्या कामांत ढवळाढवळ करची न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
