भांगरभूंय | प्रतिनिधी
गोमेकॉंत रोखडीच कांक्र ओपीडी, भलायकी सेवे खातीर निती धोरण
पणजी: गोंयांत टाटा मेमोरियल कांक्र हॉस्पिटल येता त्या देड ते दोन वर्सांत पुराय जातलें. गोंय वैजकी म्हाविद्यालय हॉस्पिटलांत बेगिनूच कांक्राची ओपीडी सुरू जातली. भलायकी सेवे खातीर निती धोरणा प्रमाण आवश्यक गजालींची कार्यवाही जातली, अशें भलायकी मंत्री विश्वजीत राणे हांणी स्पश्ट केलें.
कपात सुचोवण्यो भायरावन सभाघरान भलायकी, गोंय वैजकी म्हाविद्यालयाच्या मागण्यांक मान्यताय दिली. राज्यातले जनतेक सर्वोत्कृश्ट वैजकी सेवा दिवपाक सरकार कटीबद्द आसा, अशें चर्चेक जाप दितना भलायकी मंत्र्यांनी सांगलें. टाटा मेमोरियल हॉस्पिटल स्वायत्त पद्दतीन चलोपाचो संंस्थेचो प्रस्ताव आसा. काय परवाने मेळपाक कळाव जाल्ल्यान हॉस्पिटलाक कळाव जाला.
गोंय वैजकी म्हाविद्यालय हॉस्पिटल सर्वोत्कृश्ट हॉस्पिटल करपाचो यत्न आसा. हाचे खातीर काय सेवा आवटसोर्स करच्यो पडटल्यो. राज्यांत दोतोरांचो उणाव आसा. गोंयचे तज्ञ दोतोर जे भायर गेल्यात, तांकां राज्यांत येवकार आसा. सरकाराच्या यत्नाक लागून अमर प्रभुदेसाय आनी हेर तज्ञ दोतोर राज्याक सेवा दिवपाक तयार जाल्यात. पांवडया पांवड्यान भलायकी सुविधांचो विस्तार जातलो.
गोंय वैजकी म्हाविद्यालयांत पॅट (पोझिट्रोन एमिशन टोमोग्राफी) मशिना खातीर सरकारान मान्यताय दिल्या. तशेंच 108 एम्बुलन्सींचो आंकडो वाडपाचो आसा. कांक्र आनी गोडेंमूत हीं दुयेंसां अधिसुचीत जातलीं. दोतोरांचो उणाव आशिल्ल्यान मुळाव्या भलायकी केंद्रांनी शस्त्रक्रिया करप शक्य जायना, अशें भलायकी मंत्र्यांनी सांगलें.
आयपीएचबी (मानसोपचार हॉस्पिटल)चे नांव बदलपाचो प्रस्ताव आसा. ह्या नांवाक लागून कांय जाण हॉस्पिटलांत दाखल जावपाक पळयनात.
दक्षीण गोंय जिल्हो हॉस्पिटल खासगी संस्थे कडेन दिवपाचो सरकाराचो कसलोच प्रस्ताव ना. कांय सेवा आवटसोर्स केल्यान सुदारणा जाल्या. गोंय वैजकी म्हाविद्यालयांत जेवणाचें कंत्राट सोडेक्सो कडेन दिले उपरांत नितळसाण दिश्टी पडटा. फोंडें उपजिल्हो हॉस्पिटलांत सीटी स्कॅन मशीन सीएसआर कार्यावळी खाला बसयतले, अशें भलायकी मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
