उद्देगीक वसणुकेंतलीं अतिक्रमणां सोदपाक समिती स्थापन

भांगरभूंय | प्रतिनिधी

– दिल्ली सुवात आनी आशिल्ले सुवातेंत फरक

– समितीच्या अहवाला प्रमाण जातली कारवाय

– फरक 5 टक्क्यां मेरेन आसल्यार कारवाय ना

भांगरभूंय । प्रतिनिधी

पणजी : उद्देगीक वसणुकेंतल्या सुवातांचेर जावपी अतिक्रमणांचो सोद घेवपा खातीर सरकारान समिती स्थापन केल्या. समितीच्या अहवाला प्रमाण अतिक्रमणांचेर कारवाय जातली. अतिक्रमणां कित्याक जाल्या आनी कारवायेची शिफारस समिती करतली. उद्देगाक जी सुवात (प्लॉट) दिला आनी तांचे कडेन जी सुवात आसा, तातूंत फरक आसा. हो फरक कित्याक जाला, ताच्या कारणांचो सोद समिती घेतली.

आमदार कार्लोस फेरेरा, एल्टन डिकोस्टा आनी युरी आलेमांव हांच्या लेखी प्रस्नाक उद्देग मंत्री मॉवीन गुदिन्हो हांणी ही लेखी जाप दिल्या.

कांय वर्सां पयलीं उद्देगांक उद्देगीक वसणुकांनी प्लॉट दिल्ले. त्या वेळार हातांनी सर्वे करून प्लॉटाचें मेजमाप जाल्लें. जीपीएस सर्वे केल्या उपरांत उद्देगांच्या ताब्यांत आशिल्ली सुवात आनी दिल्ली सुवात (प्लॉट) हातूंत फरक आशिल्ल्याचें दिसून आयलां. जीपीएस सर्वे हो हातान (मॅन्युयल) केल्ल्या सर्वे परस बिनचूक आसता. सर्वेची पद्दत बदलिल्ल्यान सुवातेंत फरक जावपाची शक्यताय आसा. उद्देजकांनी अतिक्रमण केलां काय हेर कारणांक लागून सुवातेंत फरक आसा, ताचो सोद समिती घेतली. ही समिती सरकाराक अहवाल सादर करतली, असो उल्लेख लेखी जापेंत आसा.

सावियो कोरिया हे समितीचे अध्यक्ष आसा. आशा वायंगणकार, सोहन उस्कैकार आनी लुसियानो कोस्ता हे समितीचे हेर वांगडी आसा. हे समितीन वावर सुरू केला, असो उल्लेख आसा.

उद्देगांक दिल्ली सुवात आनी ताब्यांत आशिल्ले सुवाते मदीं 5 टक्क्यां मेरेन फरक आसलो जाल्यार कसलीच कारवाय करिनासतना आशिल्ली सुवात ताका दितले.

उद्देगांक दिल्ली सुवात आनी ताब्यांत आशिल्ले सुवाते मदीं 5 टक्क्यां परस चड फरक आसली जाल्यार समितीच्या शिफारशी प्रमाण कारवाय जातली.

उद्देगीक वसणुकेंतले सुवातेचें (प्लॉट) सर्वेक्षण करपा खातीर उद्देगीक वसणूक म्हामंडळान समन्वय अधिकाऱ्याची नेमणूक केल्या. उद्देगीक संघटणा आनी जमीन सर्वेक्षण खात्या कडेन संपर्क सादून ताणें सर्वेच्यो तारखो निश्चीत केल्यात. उद्देग खात्या कडेन कितले हरीत उद्देग आसात आनी कितले रॅड कॅटेगरींतले उद्देग आसात, हाची म्हायती ना. ही म्हायती प्रदुशण नियंत्रण मंडळ एकठांय करून दवरता असो उल्लेख जापेंत आसा.