भांगरभूंय | प्रतिनिधी
पणजी ः बायलां आनी बाल कल्याण खात्यान मुरगांव मतदारसंघांतल्या एके बायलेक सेगीत तीन म्हयने गृह आधार येवजणेचो फायदो दिलो आनी ताचे उपरांत संबंदीत लाबार्थ्याक मरण आयिल्ल्याचें दाखयले हो प्रकार आमदार संकल्प आमोणकार हांणी बिरेस्तारा सभाघरांत नदरेक हाडलो. ह्या प्रकरणाची चवकशी करपाची हमी बायलां आनी बाल कल्याण खात्याचे मंत्री विश्वजीत राणे हांणी दिली.
बिरेस्तार प्रस्न सत्रांत आमदार आमोणकार हांणी मुरगांव मतदारसंघांतल्या गृह आधार आनी लाडली लक्ष्मी ह्या दोन येवजण्यांचे अर्ज प्रलंबीत आसात अशें सांगून तांच्या अर्जांक केन्ना मान्यताय मेळटली असो प्रस्न केलो. तेच बरोबर मुरगांवांतल्या एके बायले संबंदी घडिल्लो प्रकारुय तांणी सांगलो. गृह आधार येवजणे खातीर संबंदीत बायलेन दाखल केल्लो अर्ज खात्यान सप्टेंबर 2023 वर्सा मान्य केल्लो. ते उपरांत डिसेंबर मेरेन तिका अर्थीक आदारय मेळ्ळो.
जानेवारी सावन तिची अर्थीक मजत बंद जाले उपरांत तिणें खात्या कडेन हे विशीं चवकशी केली. तेन्ना संबंदीत लावार्थ्यांक मरण आयलां म्हूण तिची अर्थीक मजत बंद केल्या अशें तिचे नदरेक आयलें. हाचेर मंत्री राणे हांणी फावो तो उपाय सोदून काडचो अशी मागणी आमोणकार हांणी केल्या. आमोणकार हांच्या प्रस्नाचेर विरोधी पक्ष फुडारी युरी आलेमाव, आमदार विजय सरदेसाय, डिलायला लोबो हांणीय गृह आधार आनी लाडली लक्ष्मी येवजण्यांचे प्रलंबीत आशिल्ल्या अर्जांचे बेगीनांत बेगीन निवाडो करचो अशी मागणी मंत्री राणे हांचे कडेन केली.
मजगतीं, आमोणकार हांच्या प्रस्नाक जाप दितना मंत्री राणे हांणी सभाघरांत विधानसभा अधिवेशन सोंपा मेरेन बायलां आनी बाल कल्याण खात्याच्या समितीची बसका घेवन गृह आधार, लाडली लक्ष्मी येवजणांच्या प्रलंबीत अर्जांचो निवाडो एकाच वेळार करतले अशी हमी मंत्री विश्वजीत राणे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
