भांगरभूंय | प्रतिनिधी
पणजीः गोवा मायल्सच्या 1500 टॅक्सीं वरवीं फाटल्या स वर्सांत सरकाराक 8.05 कोटी रुपयांची येणावळ मेळ्ळ्या. पूण 18 हजार थळाव्या टॅक्सींक लागून सरकाराक 500 कोटी रुपया येणावळीचे लुकसाण जाला अशें सांगून येरादारी मंत्री माविन गुदिन्हो हांणी बिरेस्तारा विधानसभा सभाघरांत गोवा मायल्सच्या प्रस्नाचेर जाप दिली.
मोपा मनोहर आंतरराष्ट्रीय विमानतळा वयले गोवा मायल्स कावंटर बंद करपाक जाय. गोवा मायल्स बुकींग आनी ऑनलायन अशा दोनूय पद्दतीन गिरायक मेळयता. थळाव्या टॅक्सीकारांक ताचो फटको बसता. गोवा मायल्स अॅप बेस टॅक्सी सेवेंत चडशे भायले आसात. ते खातीर तांचे कावंटर बंद करचे अशी मागणी पेडणेंचे आमदार प्रवीण आर्लेकार हांणी प्रस्नाच्या सत्रांत केली. ताचेर उलयतना मंत्री गुदिन्हो हांणी गोवा मायल्सचो इतिहास मांडलो आनी ही अॅप बेस टॅक्सी सेवेची राज्यांक सामकी गरज आसा अशें स्पश्ट केलें.
गोवा मायल्स ही अॅप बेस सेवा राज्यांत 2018 वर्सा सावन सुरू जाल्या. हे सेवेंत वांटेकार जाल्ल्या टॅक्सीं मदीं 90 टक्के टॅक्सी ताचे धनी चलयतात. उरिल्ल्या 10 टक्के टॅक्सीचेर ड्रायव्हरांची नेमणूक केल्या. गोवा मायल्सान हे सेवेंत थळाव्या लोकांक सगळ्यांत चड प्राधान्य दिलां. गोवा मायल्सांत 1500 टॅक्सी आसात आनी 2018 वर्सा सावन जीएसटी आनी टीडीएस फारीक करतात.
तातूंतल्यान फाटल्या स वर्सांत सरकाराक 8.05 कोटी येणावळ मेळ्ळ्या. राज्यांत 18 हजार थळाव्यांच्यो टॅक्सी आसात. ह्या टॅक्सींचे धनी अजून अॅप सेवेंत वांटो घेनात. सरकारी अॅप सेवेंत सामील जावपाचे नासल्यार तांच्यानी स्वताचो स्वतंत्र अॅप सुरू करचो अशें आवाहन सरकारान तांकां केल्लें. तरी ते आयकुपाक तयार नात. तांकां लागून राज्य सरकाराच्या येणावळींत 500 कोटी रुपया लुकसाण जालां अशें मंत्री गुदिन्हो हांणी सांगलें. राज्य सरकारान गोवा मायल्सांतल्यान ‘मुख्यमंत्री- गोंयचो टॅक्सी पात्रांव’ ही येवजण सुरू केल्या. राज्यभरांतल्या जायत्या तरणाट्यांक हे येवजणेचो फायदो जाला असोय उल्लेख तांणी केलां.
दर दिसा सुमार 1200 नागरिक घेतात सेवा
गोवा मायल्स टॅक्सी सेवा थळाव्या लोकांनी स्विकारल्या. आतां मेरेन 55 लाख प्रवाशांनी हे सेवेचो लाव घेतला, तातूंतले 50 टक्के प्रवासी थळावे आसात. आयज लेगीत 1000 ते 1200 प्रवासी गोवा मायल्स टॅक्सी सेवेचो लाव घेतात अशेंय मंत्री मावीन गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
