भांगरभूंय | प्रतिनिधी
पाटणा, खबरां संस्था ः नीट यूजी पेपर लीक जाल्ल्या प्रकरणांत सीबीआयन पाटणा एम्सच्या तीन दोतोरांक ताब्यांत घेतल्या. हे तिनूय दोतोर 2021 बॅचचे विद्यार्थी आसात.
सूत्रांनी दिल्ले म्हायती प्रमाण, अटक केल्ल्या तीनूय दोतोरांचो लॅपटॉप आनी मोबायल सीबीआयन जप्त केला. पेपर लीक प्रकरणांत संबंदीत आशिल्ल्या सगळ्यांक सीबीआयन धरल्यात, जे पेपर चोरपा सावन उमेदवारांक पावोवपा मेरेन संबंदीत आशिल्ले. पेपर व्हरपी ट्रका विशीं म्हायती आरोपीं मेरेन पावली आनी ही म्हायती कोणे दिली हाची लिंक आतां एजन्सी सोदता.
सीबीआयन मंगळारा पंकज कुमार आनी राजूक अटक केली. पंकजानच ट्रकांतल्यान कागदपत्रां चोरून व्हेल्लीं. पंकज आनी राजू हांची बुधवारा सात वरां परस चड वेळ सीबीआयन चवकशी केली. नीट पेपर लीक प्रकरण सीबीआय कडेन दिल्या उपरांत 25 दिसांनी आतां मेरेन 7 राज्यांतल्यान 42 आरोपींक अटक केल्या.
सर्वोच्च न्यायालयांत आयज 40 याचिकांचेर सुनावणी
सर्वोच्च न्यायालयांत आयज बिरेस्तारा वादग्रस्त नीट यूजी 2024 संबंदीत याचिकांचेर सुनावणी जातली. मुखेल न्यायाधीश चंद्रचूड, न्यायाधीश पार्डीवाला आनी न्यायाधीश मनोज हांच्या खंडपिठा मुखार 40 परस चड याचिकांचेर सुनावणी जातली. हाचे आदीं 11 तारखेक परिक्षा रद्द करप, परतून परिक्षा घेवप अशा हेर याचिकेचेर खंडपिठान सुनावणी 18 तारखे मेरेन स्थगीत केल्ली.
नीट पेपर लीक प्रकरणांत सीबीआयन बिरेस्तारा बिहारांतल्यान रॉकी उर्फ राकेश हाका अटक केली. सीबीआयच्या सुत्रांनी दिल्ले म्हायती प्रमाण एनईईटीचो पेपर लीक जाले उपरांत रॉकीन हो प्रस्न सुटावो करून आरोपी चिंटूच्या मोबायलाचेर धाडलो. केंद्रीय तपास एजन्सीन सकाळीं रॉकीक अटक करून न्यायालयांत हजर केलो. न्यायालयान ताका 10 दिसांच्या कोठीचेर सीबीआय कडेन दिलो.
संजीव मुखिया हो बिहारांतल्या पेपर लिका प्रकरणाचो मुखेल मास्टरमायंड. तो नालंदा जिल्ह्यांतल्या नागरनौसा हांगा रावता. हे प्रकरण उजवाडाक आयला तेन्ना सावन तो फरारी आसा. अटक केल्लो रॉकी हो फरारी संजीव मुखिया हाचे सामको लागींचो अशें कळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
