भांगरभूंय | प्रतिनिधी
नवी दिल्ली, खबरां संस्था: केंद्रीय अर्थमंत्री निर्मला सीतारामन २३ जुलयाक देशाचो २०२४- २५ चो अर्थसंकल्प लोकसभेंत सादर करतली. २०२४- २५ च्या अर्थसंकल्पांत सरकारी कर्मचार्यां खातीर म्हत्वाची घोशणा जावपाची शक्यताय उक्तायल्या. सरकारी कर्मचार्यांक आठव्या वेतन आयोगाचो लाव मेळपाची घोशणा ह्या अर्थसंकल्पांतल्यान जावपाची शक्यताय आसा. केंद्र सरकाराक आठव्या वेतन आयोगाचो प्रस्ताव मेळ्ळा. हातूंत सरकारी कर्मचारी आनी पेन्शनधारकांचें सध्याचें वेतन, भत्ते आनी लावाचो आढावो घेतला. येवपी अर्थसंकल्पांत ह्या प्रस्तावाचो आसपाव करचे खातीर हो प्रस्ताव मोदी सरकारा कडेन धाडला अशी म्हायती मुखार आयल्या.
६ जुलयाक केंद्रीय कर्मचारी आनी कामगारांच्या महासंघान अर्थसंकल्प २०२४ आदीं आपल्यो मागण्यो मांडल्यो. मात आतां परत केंद्रीय कर्मचार्यांनी कॅबिनेट सचिवांक पत्र बरयलां. हातूंत तांणी आपल्या मागण्यांचो प्रस्ताव मांडला. हातूंत आठव्या वेतन आयोगाची स्थापना ही मुखेलपणान मागणी केल्या. केंद्रीय कर्मचारी राष्ट्रीय कर्मचारी आनी केंद्रीय कर्मचारी परिशदे खातीर जोड सल्लागार यंत्रणेचे सचीव शिवगोपाल मिश्रा हांणी कॅबिनेट सचिवांक पत्र बरयलें.
दर धा वर्सांनी एक केंद्रीय वेतन आयोग स्थापन करता. हो वेतन आयोग सरकारी कर्मचार्यांच्या वेतन रचणुकेचो, भत्त्यांचो, लावांचो आढावो घेवन म्हारगायेच्या आदाराचेर गरजेचे बदल सुटयता. ते प्रमाण सचीव शिवगोपाल मिश्रा हांणी आठवो वेतन आयोग स्थापन करपाची मागणी केल्या. ताका लागून फुडल्या अर्थसंकल्पांत ८ व्या वेतन आयोगाची घोशणा जावपाची शक्यताय उक्तायल्या.
८ व्या वेतन आयोगा खाला खंयचे फायदे मेळटले?
१ जानेवारी २०२६ सावन कर्मचार्यांचे पगार आनी निवृत्तीवेतन सुधारपा खातीर केंद्र सरकार फुडलें वेतन आयोगाच्यो शिफारशी लागू करपाची शक्यता आसा. केंद्र सरकार १० वर्सांनी नवीन वेतन आयोग लागू करतलें. ३१ डिसेंबर २०२५ दिसा ७ व्या वेतन आयोगाचो कार्यकाळ १० वर्सांचो जातलो. हो कार्यकाळ पुराय जाले उपरांत ८ वो वेतन आयोग लागू जातलें.
केंद्रीय कर्मचार्यांच्या पगाराची गणना करण्यासाठी फिटमेंट फॅक्टर वापरता. सध्या हो फिटमेंट फॅक्टर २.५७ इतको आसा. म्हळ्यार मूळ वेतन उण्यात उण्या वेतनाच्या २.५७ पट आसतलो. जर ८ वो वेतन आयोग लागू जाल्यार तो ३.६८ इतलो जावपाची शक्यताय आसा. ७ व्या वेतन आयोगा प्रमाण पिराय पे मॅट्रिक्स स्तर १ चेर मूळ पगार १८,००० रुपया आसतलो जाल्यार ८ व्या वेतन आयोगा प्रमाण मूळ पगार २१,६०० रुपयां मेरेन वाडपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
