भांगरभूंय | प्रतिनिधी
मडगांव, प्रतिनिधी ः उटंगराच्या पावसाक लागून मडगांव वाठारांत झाडां पडून घरांचीं वणत कोसळून जखमी जावन मरण येवपाच्यो घडणुको घडल्यात. दोन दिसां आदीं मार्ले फातोड्डेंच्या निवासी इमारतीचेर राखणे वणत कोसळिल्ल्यान चार फ्लॅटांचें लुकसाण जाल्लें. तेच सुवातेर परतून मातयेच्या भरावा सयत राखणे वणत आनी झाड इमारतीचेर पडून आनीक चार फ्लॅटांचें लुकसाण जालां.
मेळिल्ले म्हायती प्रमाण पयले घडणुके उपरांत उजो पालोवपी दळान इमारतीच्या फाटल्यान आशिल्लीं झाडां कापून उडयलीं. तेन्ना थंयच्या लोकांनी आपत्कालीन यंत्रणेच्या अधिकाऱ्यांक म्हायती दिवन राखणे वणत आनी झाडां काडून उडोवपाची मागणी केल्ली. पूण दुसरे वटेन आशिल्ली धोक्याची राखणे वणत आनी ताचेर आशिल्लीं झाडां कापूंक नाशिल्लीं. ताका लागून बिरेस्तारा सकाळीं साडेचार वरांचे सुमाराक रायेश चेंबर इमारतीचेर राखणे वणत आनी व्हडलें जांबळीचें झाड पडलें. हांतूत इमारतीच्या सकयल्या भागांतल्या तीन फ्लॅटांचें आनी झाडां पडिल्ल्यान वयल्या फ्लॅटांचें लुकसाण जालां.
थंयच्या लोकांनी दिल्ले म्हायती प्रमाण हे राखणे वणत संबंदींत सोसायटीन जिल्लोधिकारी कार्यालयांत आनी पालिके कडेन कागाळ केल्ली. पूण तें खाजगी सुवातेर आसा अशें पालिके कडल्यान सांगिल्लें.
मजगतीं, इमारतींचेर मातयेचो भराव आनी राखणे वणत कोसळून लुकसाण जालां. आतां हांगा रावप धोक्याचे दिसता. फ्लॅट घेतिल्ले रीण लेगीत अजून फारीक जावंक ना. आतां आमकां हेर सुवातीर भाड्यान रावचें पडटलें. अशे स्थितींत कितें करचें हो प्रस्न लुकसाण जाल्ल्या फ्लॅटकारांक पडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
