भांगरभूंय | प्रतिनिधी
शॉटपुटांतल्यान आभा खातुआचें नांव मारलें भायर
नवी दिल्लीः खेळां मंत्रालयान पॅरिस ऑलिम्पिकांत भारताच्या निमाण्या पंगडाक मान्यताय दिल्या उपरांत ११७ खेळगडे आनी १४० सहाय्यक आशिल्लो भारताचो २५७ वांगड्याचो पंगड ऑलिम्पिक खेळा खातीर निश्चीत जाला. हातुंतल्यान शॉटपुटांतल्यान आभा खातुआचें नांव काडलां.
संवसारीक क्रमवारी प्रमाण पात्रताय मेळोवपी आभा खातुआचें नांव कांय दिसां आदीं वर्ल्ड एथलेटिक्सान ऑलिम्पिक सर्तकांच्या निमाण्या वळेरेंतल्यान काडिल्लें. ताका लागून भारतानूय तिचें नांव काडलें. तिका काडपाचें कारण दिवंक ना.
भारतीय संघा वांगडा धाडपी १४० सहाय्यकांचे वळेरेंतल्यान ७२ जाणांक सरकारी खर्चान वचपाची परवानगी दिल्या. तांच्या रावपाची वेवस्थाय खेळांच्या केंद्रा लागसारा आशिल्ल्या हॉटेलांनी करतले. ऑलिम्पिक २०२४ खातीर आखिल्ल्या खेळां ग्रामांत फकत ६७ जाणांक अधिस्वीकृती दितले. हातूंत ११ वांगडी भारतीय ऑलिम्पिक संघटणेचे पदाधिकारी आसतले आनी हातुंतले पांच जाण वैजकी अधिकारी आसतले.
नेमबाजी खातीर सगळ्यांत चड १८ सहाय्यक कर्मचारी आसततले. हातूंत एक सर्वोच्च कार्यप्रदर्शन संचालक आनी स प्रशिक्षकांचो आसपाव आसतलो. हे सगळे खेळां ग्रामांत आसतले. उरिल्ल्या ११ जाणांची वेवस्था हॉटेलांनी करतले. ऍथलेटिक्स (१७), कुस्ती (१२), बॉक्सिंग(११), हॉकी (१०), टेबल टेनीस (९), बॅडमिंटन (९), गोल्फ(७), घोडेस्वार (इक्वेस्टेरियन:५), तिरंदाजी (४), सेलिंग (४), वेटलिफ्टींग (४), टॅनीस (३), पेंवप (२) आनी ज्युडो (१) ह्या खेळां खातीर सहाय्यक आसतले. गोल्फ सर्त पॅरिस साव ४२ किमी अंतराचेर आशिल्ल्यान पुराय भारतीय गोल्फ संघ खेळां ग्रामा बदला सर्त केंद्रा लागसारच्या हॉटेलांनी रावतले.
पॅरिसांतल्या भारतीय दुतावासांतले अधिकारी एअर कमोडोर प्रशांत आर्य हे अधिस्वीकृतीधारक ऑलिम्पीक संघ सहाय्यक आसतले. खेळां ग्राम आनी सर्त केंद्रा विशीं आशिल्ल्या खंयचेय आडखळींत ते लक्ष घालतले, अशें मंत्रालयान स्पश्ट केलां. तशेंच पॅरिस संयोजन समिती वतीन भारतीय संघा खातीर चालकां बगर तीन गाडयो उपलब्ध करून दितले. हे खातीर चालकांची निवड करपाची जबाबदारी भारतीय दुतावासा कडेन सोंपयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
