भांगरभूंय | प्रतिनिधी
आमच्या देशांत सगल्यांत चड फॅन फॉलोअर्स कोणाचे आसतले जाल्यार ते सिनेमांनी काम करपी अभिनेते आनी क्रिकेट खेळपी खेळगड्यांचे. कारण सिनेमा आनी क्रिकेट हो आमचे जिणेचो अविभाज्य भाग आसा. सिनेमा आनी क्रिकेटी बगर भारतीयांची जीण अपूर्ण. एका प्रकारान सिनेमा आनी क्रिकेट हो भारतियांचो स्वास, अशें म्हणत जाल्यार कांयच चुकीचें जावचें ना. क्रिकेटीक जाल्यार भारतांत धर्म मानतात, आनी कांय प्रेक्षक सिने अभिनेत्यांक देव मानून तांची पुजा करतात.
दक्षीणेंत जाल्यार खूबश्या अभिनेत्यांची देवळां लेगीत बांदून तांची पुजा करतात. भारतीयांचे नदरेन सिने अभिनेते आनी क्रिकेट खेळगडे म्हणल्यार सगलें किदें अशें म्हणूनच तांचे लाखांनी चाहते आमच्या देशांत दिसून येतात. चड करून तरणाटो वर्ग जाल्यार सिने अभिनेते आनी क्रिकेट खेळगडे हांकां आपलो आयडॉल मानतात. तांचे प्रमाण दिसप, वागप, कपडे घालप, केंसाची स्टायल करप अशे तरेचे यत्न तरणाटे करीत आसतात. ताका लागून सिने अभिनेते आनी क्रिकेट खेळगडे हांची जापसालदारकी आनीक वाडटा.
जर तरणाटे आपलें अनुकरण करीत आसतात जाल्यार आपली वर्तणूक आदर्श आसूंक जाय. आपले वर्तणुकेंतल्यान वा आपूण करीत आशिल्ले जायरातींतल्यान तरणाट्यांक बरो संदेश वचूंक जाय हाची जतनाय ह्या सिलिब्रेटींनी घेवंक जाय. पूण हालीं पयश्यां खातीर सिने अभिनेते आनी क्रिकेट खेळगडे आपली जापसालदारकी विसरत चल्ल्यात. जो तरणाटो वर्ग आपल्याक फॉलो करता, आपल्याक आदर्श मानता तांकां आमी पयश्यां खातीर कितें करपाक लायतात हाचेंय भान ह्या सिलिबेटींक उरिल्लें ना. आतां हेंच पळयात. ज्या सिने अभिनेत्यांचें अनुकरण करपाचो यत्न तरणाटे करतात तेच सिने अभिनेते गुटख्याची जायरात करून तरणाट्यांक गुटखा खावपाक सांगतात. शाहरुख खान, अजय देवगण, अक्षय कुमार हे सारके हिंदी सिने मळा वेले कलाकार गुटख्याची जायरात करतात आनी तरणाट्यांक गुटखा खावपाक प्रोत्साहीत करतात. अभिनेते पयशां खातीर चुकीची जायरात करून तरणाट्यांक वेसना कडेन वळयतात अशें म्हणत जाल्यार अतिताय जावची ना.
तशेंच क्रिकेट खेळगडे. वास्तवीक क्रिकेट खेळगडे हे आमच्या देशाचे प्रतिनिधित्व करतात. विदेशांत गेले उपरांत तांकां आमच्या देशाचे राजदूत म्हूण वळखतात. तरणाटो वर्गूय क्रिकेट खेळगड्यांचें अनुकरण करीत आसतात. तेच देशाचे राजदूत आशिल्ले क्रिकेट खेळगडे पयश्यां खातीर ऑनलायन जुगाराची जायरात करतात. ऑनलायन जुगाराक लागून तरणाटो जुगारी जाल्यार गुटख्याक लागून वेसनी जायत आसा. आयचो तरणाटो फाल्यांचो नागरीक. देशाचो फुडार तरणाट्यांचेर निंबून आसा. हें सगलें खबर आसून लेगीत अशे तरेची जायरात करून तरणाट्यांक वेसनी आनी जुगारी करपाचें काम हे सिलिब्रेटी करतात. हो एक प्रकारचो देशद्रोहूच आसा. सिने अभिनेते आनी क्रिकेट खेळगडे पयश्यां खातीर अशे तरेचो देशद्रोह करून तरणाट्यांची जीण उध्वस्त करीत आसात जाल्यार तांकां आमी आदर्श कशें म्हणप? अजून लेगीत वेळ गेल्लो ना. सिने अभिनेते आनी क्रिकेट खेळगडे हांणी गुटख्याची आनी ऑनलायन जुगाराची जायरात करप थांबोवची. पयश्यां खातीर आमी तरणाटे पिळगे मुखार कसलो आदर्श दवरतात हाचो विचार ह्या सिलिब्रेटींनी करचो. तुमी देशाचे सन्माननीय नागरीक आसात. देशांतले लाखांनी न्हय जाल्यार कोट्यांनी लोक तुमकां आपलो आदर्श मानतात. ताका वेर वचत अशें वागूं नाकात. देशा खातीर आनी देशांतल्या तरणाट्यां खातीर तुमचीय कितें तरी लागणूक आसा हाचें भान दवरून गुटख्याच्यो आनी ऑनलायन जुगाराच्यो जायराती बंद करात आनी तरणाट्यां मुखार आदर्श निर्माण करतात.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
