भांगरभूंय | प्रतिनिधी
भारताचो क्रिकेट पंगड कांय दिसांनी श्रीलंकेचे भोंवडेर वचपाचो आसा. हे भोंवडे खातीर वचपी टी-20 पंगडाचें मुखेलपद सूर्यकुमार यादवाक मेळुये. हालींच जाल्ले संवसारीक टी-20 क्रिकेट सर्ती उपरांत रोहीत शर्मान आंतरराष्ट्रीय टी-20 क्रिकेटींतल्यान निवृत्ती घेतिल्ली, ते उपरांत भारताचो पंगड नव्या मुखेल्याच्या सोदांत आसा.
अश्टतासांचो खेळगडो हार्दीक पांड्याक सातत्यान जावपी दुखापतीक लागून बीसीसीआय ताच्या बदलाक नव्या खेळगड्याक मुखेली करपाचो विचार करता. सध्या हार्दीक पांड्या तंदुरुस्त आसा. तो श्रीलंकेच आडची तीन मॅचींची टी-20 माळ खेळटलो, तोच टी-20 पंगडाचें फुडारपण करपाचो आशिल्लो. पूण, बीसीसीआय आक्रमक बॅट्समन सूर्यकुमार यादवाक फकत श्रीलंकेचेच भोंवडे खातीर न्हय जाल्यार 2026चे संवसारीक टी-20 मेरेन पंगडाचें मुखेलपद दिवपा विशीं विचार करता.
राहुल द्रविडान मुखेल प्रशिक्षकपद सोडल्या उपरांत गौतम गंभीराची प्रशिक्षक म्हणून निवड जाल्या. प्रशिक्षकपदाची जापसालदारकी सांबाळ्ळ्या सावन ताणें साबार निर्णय घेवपाक सुरवात केल्या. टी-20 पंगडा खातीर चड काळ मुखेलपद सांबाळपी खेळगडो ताका जाय. हार्दीक ही जापसालदारकी सांबाळपाक योग्य आसा. पूण, हालींसाराक ताका दुखापतीन सतायला. ताच्या ह्या कारणाक लागून ही जापसालदारकी सुर्याक मेळपाची शक्यताय आसा.
भारताक 17 वर्सांनी संवसारीक टी-20 सर्त जिखून दिल्या उपरांत रोहीतान ह्या प्रकारांतल्यान निवृत्ती घेतल्या. ताचे खेरीत विराट कोहली आनी रवींद्र जडेजा हे लेगीत निवृत्त जाल्यात.
देशांतर्गत क्रिकेट सर्तींत सूर्यकुमारान मुंबय पंगडाचें फुडारपण केलां, तशेंच पोरूं नोव्हेंबरांत ताच्याच फुडारपणाखाला भारतान ऑस्ट्रेलिये आडची पांच मॅचींची टी-20 माळ 4-1 अशा फरकान जिखिल्ली. ते उपरांत दक्षीण आफ्रिके आडची माळ 1-1 अशी बादाबाद सोंडयली.
मजगतीं, शुभमन गिलाच्या फुडारपणाखाला झिम्बाब्वेचे भोंवडेर पांच टी-20 मॅचींची माळ 4-1 फरकान जिखपी भारताचो पंगड स्वदेस परतलो. ह्या पंगडांत संवसारीक टी-20 सर्त जिखपी भारताचे फकत तिनूच खेळगडे आशिल्ले. हे भोंवडेर युवा खेळगड्यांक संद दिल्ली. भारतान पयली मॅच हारल्या उपरांत बाकीच्यो चारूय मॅची जिखून माळ सहज बोल्सांत उडयिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
