भांगरभूंय | प्रतिनिधी
पणजी: सांवरगाळ धारबांदोडेंच्या सोमनाथ इंग्लीश हायस्कुलान वनमहोत्सव व्हड उमेदीन आनी तरेकवार कार्यावळींनी मनयलो. कार्यावळीक दुर्भाट फोंडेंच्या शारदा इंग्लीश हायस्कुलाचे मुख्याध्यापक वामन गांवकार हे मुखेल सोयरे म्हूण हाजीर आशिल्ले.
कार्यावळीची सुरवात विद्यार्थ्यांनी गायिल्ल्या येवकार गितान जाली. विध्यार्थिनी आयना वेळीप हाणें कार्यावळीचो हेत सांगले उपरांत शृश्टी पाटील हांणी मुखेल सोयऱ्यांची वळख करून दिली.
दरेक भुरग्यान आपल्या घरा, शाळेंत एक तरी रोंप मुजरत लावचें आनी ह्या सैमाची राखण करची असो उलो मुखेल सोयरे गांवकार हांणी आपल्या मुखेल उलोवपांतल्यान मारलो. ह्या वेळार मुख्याध्यापिका प्रज्वला बखले आनी सुदिती तेंडुलकार हांचीं उलोवपां जालीं. कार्यावळींत मुखेल सोयऱ्यांचे हस्तुकीं सोमनाथ प्रगत विज्ञान क्लबाचें उक्तावण केलें. तशेंच विध्यार्थी अयान छापरबंद आनी सांगाती विध्यार्थ्यांनी शिक्षिका सुदिती तेंडुलकार, तनया रिवणकार आनी अभिजा शेटकार हांच्या मार्गदर्शना खाला विज्ञानाचेर आदारीत सोबीत कार्यावळ सादर केली.
उपरांत मुखेल सोयरे गावकार आनी विद्यार्थ्यांचे हस्तुकीं शाळेचे भोंवतणी झाडांचीं रोपां लायलीं.
कार्यावळींचें सुत्रसंचालन विध्यार्थिनी समिक्षा साळवी आनी कनिश्का गांवकार हांणी केलें, जाल्यार जयेश जांगली हाणें सगल्यांचे उपकार मानले. कार्यावळीक पालक आनी आदले विध्यार्थी व्हड संख्येन हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
