भांगरभूंय | प्रतिनिधी
डॉ. प्रमोद सावंतः म्हापश्यां विठ्ठल देवळांत मुख्यमंत्र्यां हस्तुकीं पुजा
म्हापशें: आषाढी एकदशी निमतान मुख्यमंत्री डॉ. प्रमोद सावंत हांणी विठ्ठलवाडी, अन्साभाट म्हापशेंच्या श्रीविठ्ठल रखुमाय देवळांत विठ्ठलाचेर अभिषेक करून श्रींची म्हापुजा केली.
ह्या वेळार मुख्यमंत्री डॉ. प्रमोद सावंत हांणी समेस्त गोंयकारांक एकदशीच्यो शुभेत्सा दिल्यो. हालींच्या काळांत लोक चड करून तरणाटी पिळगी संस्कृती आनी देव भक्ती कडेन वळूंक लागिल्ल्यान ही खोशयेची गजाल आशिल्ल्याचें तांणी म्हणलें.
बुधवारा 17 वेर सकाळीं मुख्यमंत्री डॉ. प्रमोद सावंत हांणी स्वताच्या हातान गर्भकुडीतले विठ्ठल रखुमायचे मुर्तीची म्हापुजा केली. ह्या वेळार देवळांत उपसभापती ज्योशुआ डिसोझा, नगराध्यक्षा डॉ. नूतन बिचोलकार, देवळाचे अध्यक्ष तुषार टोपले, नगरसेविका प्रिया मिशाळ आनी हेर पदाधिकारी हाजीर आशिल्ले.
मुख्यमंत्री डॉ. सावंत हांणी म्हणलें, म्हापशेंच्या विठ्ठल रखुमाय देवळांत आपणाक अभिषेक आनी म्हापुजा करपाचो मान दिल्ले खातीर हांव सगल्यांचो ऋणी आसा. सद्या गोंया सावन व्हड संख्येन लोक पंढरपूरची वारी करूंक लागल्यात. ह्या वारकऱ्यांनी चंद्रभागेंत न्हाण घेवन श्रींचें दर्शन घेतिल्ल्यान तांची वारी फळादीक जाली.
आमचो देश हो संस्कृती कडेन वाटचाल करूंक लागला. हातूंतल्यान विकसीत भारत, संस्कृत भारत घडूंक लागला. हाचें उदाहरण ही वारी आशिल्ल्याचें मुख्यमंत्र्यांनी म्हणलें.
मजगतीं, अध्यक्ष तुषार टाेपले हांचे हस्तुकीं मुख्यमंत्र्यांचो शाल, यादस्तीक भेटोवन देवस्थान समिती वतीन भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
