भांगरभूंय | प्रतिनिधी
पणजी : सांतआंद्रेचे आमदार विरेश बोरकार हांच्या तारांकीत प्रस्नाक लेखी जाप दितना मुख्यमंत्री डॉ. प्रमोद सावंत हांणी, राज्यांत फाटलीं दोन वर्सां मटको जुगार प्रकरणांत १,८०५ जाणांचेर कारवाय जाल्या. मात ह्या काळांत एकूय मटका एजन्सीचेर कारवाय जावंक ना. कारवाय केल्ल्या प्रकरणांत १.४९ टक्के म्हळ्यार फकत २७ प्रकरणांतल्या बुकींक न्यायालयान ख्यास्त फर्मायल्या अशें सांगलें.
आमदार बोरकार हांणी राज्यांत जायत्या सुवातांचेर तशेंच हेर वेबसायटीं वेल्यान हो गैर प्रकार सुरु आशिल्ल्याची म्हायती सरकाराक आसा व्हय? असो प्रस्न विचारिल्लो. तशेंच हे विशीं कितें कारवाय केल्या हे विशींय म्हायती दिवपाची मागणी तांणी केल्ली. तशेंच तांणी फाटलीं दोन वर्सां मटका एजन्सीचेर कारवाय केल्ल्याची सविस्तर म्हायती तांणी मागली.
ह्या प्रस्नांचेर लेखी जापेंत मुख्यमंत्र्यांनी, राज्यांत २०२२ त ६१३, २०२३त ६२९ आनी १ जानेवारी ते १५ जून २०२४ मेरेन ५६३ मेळून १,८०५ जाणांचेर कारवाय केल्ल्याची म्हायती दिली.
तशेंच मुखार सांगतना, कारवाय केल्ल्या मदीं फकत १.४९ टक्के म्हळ्यार फकत २७ प्रकरणांतल्या बुकींक राज्यांतल्या विवीध न्यायालयान ख्यास्त फर्मायल्या. जाल्यार २६.०९ टक्के म्हळ्यार ४७१ कारवायेंतल्या दुबावितांक पुरावे नाशिल्ल्यान न्यायालयान निर्दोश सुटका केली. तशेंच ५ कारवायेंतल्या दुबावितांचे पयलेच पुरावे नाशिल्ल्यान आरोपांतल्यान सुटका केली. जाल्यार ३ दुबावितांक मरण आयिल्ल्यान तांचेर सुरू आशिल्ले न्यायालयांतले खटले बंद केले. तशेंच पुलिसां कडेन ५० प्रकरणांची चवकशी करपाची उरल्या. १,२४९ खटले राज्यांतल्या विवीध न्यायालयांनी आसात, अशी म्हायती मुख्यमंत्री सावंत हांणी लेखी जापेंत दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
