भांगरभूंय | प्रतिनिधी
फाटले वर्सा परस अंदूं १ कोटी ३० लाखांची येणावळ उणी
पणजी, प्रतिनिधी : पर्यटन वेवसाय परवान्याच्या नुतनीकरणाक लागून मेळपी सरकाराचे येणावळींत घट जाल्या. २०२२ – २०२३ ह्या अर्थीक वर्सा ७ कोटी १३ लाख ७७ हजार रूपयांची येणावळ परवान्याच्या नुतनीकरणांतल्यान सरकाराक मेळिल्ली. २०२३ – २०२४ अर्थीक वर्सा सरकाराक ५ कोटी ८२ लाख ६१ हजारांची येणावळ परवान्याच्या नुतनीकरणांतल्यान आयल्या. फाटले वर्सा परस अंदुच्या वर्सा १ कोटी ३० लाखांची येणावळ उणी जाल्या.
आमदार चंद्रकांत शेट्ये हांच्या तारांकीत प्रस्नाक पर्यटन मंत्री रोहन खंवटे हांणी जाप दितना सांगलें, फाटल्या पांच वर्सांचो विचार केलो जाल्यार दर वर्सा परवानो नुतनीकरणाची येणावळ वाडत गेल्या. मात २०२२ – २३ परस २०२३ – २४ वर्सा परवानो नुतनीकरणांतल्यान मेळपी येणावळ उणी जाल्या. एप्रील २०१९ ते मार्च २०२० मेरेन परवानो नुतनीकरणांतल्यान सरकाराक ५६८३१८० रूपयांची येणावळ आयली. हाचे उपरांत एप्रील २०२० ते मार्च २०२१ मेरेन १,३७,३२९०० रूपयांची (१ कोटी ३७ लाख) येणावळ आयली. ही वाड दुपेटीन आसा. हाचे फुडले वर्सा म्हळ्यार २०२१ ते मार्च २०२२ मेरेन ४,९६,०५५०० रूपया (४ कोटी ९६ लाख) येणावळ आयली. पयलींच्या वर्साचे तुळेंत हें प्रमाण चार पट चड आसा. एप्रील २०२२ ते मार्च २०२३ मेरेन ७,१३,७७८४० रूपया (७ कोटी १३ लाख) येणावळ आयली. एप्रील २०२३ ते मार्च २०२४ मेरेन ५,८२,६१३२० रूपया (५ कोटी ८२ लाख) येणावळ आयल्या. अर्थीक वर्स २०२२ – २३ चे तुळेंत २०२३ – २४ वर्सा परवान्यांच्या नुतनीकरणांतल्यान मेळपी येणावळ उणी जाल्या. येणावळ उणी जावपाचें कारण मात लेखी जापेंत ना.
१ एप्रील २०२१ सावन सरकारान परवानो नुतनीकरणाचें शुल्क वाडयलें. २०२१ पयलीं ए कॅटेगरींतल्या हॉटेलां खातीर पयली ५ हजार रूपया नुतनीकरण शुल्क आशिल्लें. १ एप्रील २०२१ उपरांत १०० रूमा परस चड रूमांच्या हॉटेलां खातीर १ लाख, ५० ते १०० रूमां मेरेन ७५ हजार जाल्यार ५० रूमा मेरेनच्या हॉटेलां खातीर ५० हजार रूपया शुल्क आसा.
ट्रॅवल एजंटां खातीर पयली १ हजार शुल्क आशिल्लें तें आता २० हजार (ए गट), १५ हजार (बी गट), १० हजार (सी गट) आनी ५ हजार (डी गट) रूपया जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
