भांगरभूंय | प्रतिनिधी
पणजीः भुरग्यांचें अपहरण केला अशें फट सांगपी सायबर गुन्यांवकारांच्या फोन कॉलांक बळी पडूं नाकात. तांच्या मागणे प्रमाण तांकां पयशे धाडचे न्हय. ताचे आदीं पुलिशेंत संपर्क करचो अशें आवाहन मुख्यमंत्री डॉ. प्रमोद सावंत हांणी बुधवारा विधानसभेंत केलें.
आमदार संकल्प आमोणकार हांणी झीरो वरांत हो प्रस्न मांडिल्लो. फाटल्या कांय वर्सां सावन राज्यांत सायबर गुन्यांवांचो आंकडो वाडत आसा. भुरग्यांचें अपहरण जालां अशें फोन करून पालकां कडेन पयशे मागतात. जायते पालक ताचे बळी पडपाक लागल्यात. हाचेर सरकारान फावो ती कारवाय करची अशी मागणी आमोणकार हांणी केल्ली.
हाचेर उलयतना मुख्यमंत्री डॉ. प्रमोद सावंत हांणी सांगलें, अशा घडणुकांनी एक व्हडलो गट वावुरता आनी हो गट परदेशांतल्यान पालकांक अशे फोन करता. सायबर गुन्यांव फाट्यांन ह्या गटाचो सोद घेवपाक सुरवात केल्या आनी सायबर पुलिस तांचे मेरेन नक्कीच पावतले. पूण पालकांनी अशे फोन आयल्यार भियेवन रोखडेंच पयशे धाडचे न्हय. ताचे आदीं तांच्यानी पुलीसां कडेन संपर्क करप गरजेचें आसा अशें मुख्यमंत्र्यान सांगलें.
मजगतीं, फाटल्या कांय म्हयन्यां सावन राज्यांत सायबर गुन्यांवांत व्हड प्रमाणांत वाड जाल्या. पयशे दुपेट करपाचे हांयस दाखोवन वा भुरग्यांच्या अपहरणा विशीं फोन करून ऑनलायन पद्दतीन पयशे लुटतात. ते खातीर आमदार आमोणकार हांणी हो प्रस्न बुधवारा विधानसभेंत मांडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
