आंबोली घांटार पालसणां सयत व्हडलो फातर पडिल्ल्यान रस्त्यार गेली वेर
भांगरभूंय | प्रतिनिधी
सावंतवाडी : फाटल्या कांय दिसां सावन गोंयां सयत गोंयच्या आशिकुशीच्या राज्यांनीय पावसान नेट धरला. उटंगराच्या पावसाक लागून विवीध सुवातांचेर पालसणां पडिल्ल्यान बरेंच लुकसाण सोंसचे पडलां. तशेंच जायत्या जाणांण आपलो जिवूय होगडावचो पडलो. मेळिल्ले म्हायती प्रमाण, आंबोली घांटार दोंगरा वयल्यान पालसणां सयत एक व्हड फांतर (खडप) देंवून कोसळिल्ल्यान रस्त्याक वेर आयल्या. ताका लागून रस्तो खचपाची शक्यताय आसा. ही घडणूक आयज सकाळीं सुमार सात वरांचेर घडली. हातूंत कोणाकूच कांय जावंक ना.
मजगतीं, दोन सप्तकां आदीं कोसळिल्ल्या पालसां वांगडा असोच फातर रस्त्यार आयिल्ल्यान रस्त्यार वेर गेल्ली. ह्या वेळार जेसीबी वरवीं पालसणां कुशीक करून येरादारी सुरळीत केली. सध्या हांगा पालसणां कोसळिल्ल्यान ताचो परिणाम येरादारीचेर जाला. ताका लागून एके वटेन येरादारी सोडल्या. जाल्या एसटी येरादारी बस स्टॅण्डाचेरूय आडायल्या. हे विशींची म्हायती मेळटाच पुलीस घडणुके सुवातेर दाखल जाले आनी तांणी पळोवणी केली.
आंबोलीचे पुलीस हवालदार दत्तात्रेय देसाय हांणी भौशीक बांदकाम विभागाक हे विशींची म्हायती दिली. सध्या हांगा जेसीबी वरवीं हो फातर काडपाचें काम हातांत घेतलां. बेगीनूच रस्तो येरादारी खातीर उक्तो करतले. ही घडणूक घडटना ते सुवातेर कोणूच नाशिल्ल्यान कोणाक कांय जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
