भांगरभूंय | प्रतिनिधी
अहमदाबाद, खबरां संस्था: देशांतल्या जायत्या नव्या व्हायरसांक लागून जायत्या जाणांचो जीव गेला. जायत्या व्हायरसांची लस अजून मेळूंक ना. अशाच एका व्हायरसाक चांदिपुरा म्हणटात. सध्या गुजरातांत ह्या व्हायरसाक लागून चार भुरग्यांक मरण आयलां. हो व्हायरस पयलेच खेपे म्हाराष्ट्रांत सांपडलो.
चांदिपुरा व्हायरसाची म्हायती उजवाडाक आयले बराबर पुराय देशांत बोवाळ जालो. हाका लागून देशांतलीं भलायकी यंत्रणां सादूर जाल्यांत.
चांदिपुरा व्हायरसाचे मेळिल्ले चड म्हायती प्रमाण गुजरातांतल्या साबरकांठा आनी अरावली जिल्ह्यांत चांदिपुरा व्हायरसाक लागून चार भुरग्यांक मरण आयलां. देखून लोकां मदीं भंय पातळ्ळा. तशेंच ह्या व्हायरसाची लागण जाल्ल्या दोग भुरग्यांचेर हिंमतनगरच्या सिव्हिल हॉस्पिटलांत उपचार सुरू आसात. सगल्या भुरग्यांचे रगताचे नमुने पुण्याच्या नॅशनल इन्स्टिट्यूट ऑफ व्हायरोलॉजी (एनआयव्ही) कडेन पुष्टी करपा खातीर धाडल्यात.
चांदिपुरा व्हायरस म्हळ्यार कितें?
ह्या व्हायरसाचो पयलो दुयेंती महाराष्ट्रांत १९६६ वर्सा सांपडलो. ह्या व्हायरसाची म्हायती नागपूरच्या चंदिपुराक उजवाडाक आयली. देखून ताका चांदिपुरा व्हायरस अशें नांव पडलें. २००४ ते २००६ आनी २०१९ मेरेन आंध्र प्रदेश, महाराष्ट्र आनी गुजरातांत हो व्हायरस सांपडलो. चांदिपुरा हो एक आरएनए व्हायरस. जो मादी फ्लेबोटोमायन मुसां वरवीं पातळटा. ताच्या प्रसाराक एडीस जळार जापसालदार आसात.
१५ वर्सां सकयल्या भुरग्यांक चड करून चांदिपुरा व्हायरसाची लागण जाता. चांदिपुराचेर उपचार करपाक अजून व्हायरस विरोधी वखद तयार जावंक ना.
चांदिपुरा व्हायरसाचीं लक्षणां कितें?
चांदिपुरा व्हायरसाची लागण जाल्यार दुयेंतीक जोर येता. ताका फ्लू सारकीं लक्षणां आनी खर मस्तिष्कदाह आसता. मस्तिष्कदाह हो मेंदवाक दाह निर्माण करपी रोग.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
