भांगरभूंय | प्रतिनिधी
मडगांव, प्रतिनिधी : ताळसाण झर फांतोड्ड्यां सकाळीं साडे स वरांचेर घर कोसळून १८ वर्सां पिरायेच्या कार्तिक चौहान ह्या तरणाट्याक मरण आयलें. जाल्यार ताचो बापूय जखमी जाला.
मेळिल्ले म्हायती प्रमाण, ताळसाण झर हांंगाच्या कोमुनिदादच्या जाग्यार जायतीं घरां बांदल्यांत. हांगा टाकये कडल्यान वयर वचपा खातीर आशिल्ल्या रस्त्यार दिग्विजय चौहान आनी कार्तिक चौहान हे बापूय आनी पूत भाड्याक रावताले. घराचे फाटले वटेनचे कुडींत दिग्विजय चौहान आनी कार्तिक हे दोगूय रातचे न्हिदिल्ले. सकाळीं साडे स वरांचेर घराची फाटली वणट कोसळ्ळी आनी घराचें पांखें सकयल आयलें. हातूंत कार्तिकाच्या आंगार पांखें पडिल्ल्यान तो गंभीर जखमी जालो. गंभीर जखमी जाल्ल्यान कार्तिकाक मरण आयलें. जाल्यार दिग्विजय चौहान हांच्या पांयाक गंभीर दुखापत जाली. हे दोगूय मुळचे उत्तरप्रदेश हांगचे आशिल्ल्यान कामगार म्हणून मडगांवां ते काम करताले. कार्तिकाची कूड दक्षीण गोंय जिल्लो हॉस्पिटलाच्या मोर्गांत दवरल्या. दिग्विजय चौहान हांचेर हॉस्पिटलांत सध्या उपचार चालू आसात. घडणुकेची म्हायती मेळटांच नगरसेवक निमिषा फालेरो हांणी घडणुकेच सुवातेर येवन मजत करपाक सुरवात केली. पालिकेच्या कामगारांकूय घडणुके सुवातेर आपयल्ले. मात घराचें पांखें काडपाचो यत्न केल्यार पुराय घर पडपाची शक्यताय आसा. नगरसेवक निमिषा हांणी राज्य सरकारान ह्या कुटुंबीयांक कितेंय मजत करची. तशेंच कोमुनिदाद जमिनींतल्या सुरक्षितताये कडेन लक्ष दिवचें अशी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
