भांगरभूंय | प्रतिनिधी
कांपाला, खबरां संस्था ः कांय दिसां आदीं अभिषेक शर्मान फक्त 45 बॉलांनी शेंकडो मारिल्लो. आयपीएलांत ट्रॅव्हिस हेडान फक्त 39 बॉलांनी शेंकडो मारिल्लो. बॅटींगेंतली अशी कामगिरी पळोवन तुमकां अजाप जालें आसतलें. मागीर आतां एके बॅटिंगेचें आयकात , ताचेर तुमचो विस्वास बसचो ना. एकल्यान 200 धांवड्यो काडल्यो आनी ताच्या बळग्यार 291 धांवड्यांनी अजापीत करपी जैतूय मेळयलें.
हो दोट्टी शेंकडो मारपी खेळगड्याचें नांव आसा, ओलिपा जेराल्ड. तो युगांडाचो. पिरायेच्या फक्त सोळाव्या वर्सा ताणें ही वादळी खेळी केल्या. युगांडांतल्या नायल रिजन काॅलेज लीग पात्रताय मॅचींत ओलिपान 204 धांवड्यो केल्यो. तातूंतल्यो 176 धांवड्यो फक्त चौके आनी सके मारून केल्ल्यो.
हे मॅचींत बुसोगा कॉलेज म्विरीन पयली बॅटींग केली आनी ओपनर ओलिपान मैदानांत पावले बरोबर बाॅलरांचो विध्वंस केलो. ओलिपान जिंजा कॉलेजीच्या बाॅलरांचेर हल्लोच केलो. 20 चवके आनी 16 सके मारून तांणें धांवड्यांचो पावस घालो. फक्त 75 बॉलांनी 204 धांवड्यो केल्यो. जिंजा कॉलेजीचो एकूय बाॅलर ताका आडावंक शकलो ना. बुसोगा कॉलेजीन 20 ओव्हरींनी 323 धांवड्यो केल्यो. ओलिपा उपरांत दुसऱ्यो सगळ्यांत चड धांवड्यो आशिल्ल्यो 53. ज्यो एक्स्ट्रा आसल्यो.
एक पंगड अशी स्फोटक बॅटिंग करता जाल्यार दुसऱ्या पंगडा कडल्यानूय असोच प्रतिसाद मेळटलो अशी अपेक्षा आसता. जिंजा कॉलेजींतल्यानय तशीच अपेक्षा आसतली, पूण जें घडलें तें कोणाच्याच कल्पने भायर आशिल्लें. बुसोगाच्या बाॅलरांनी जिंजा काॅलेजीच्या बॅटसमनांक फक्त 32 धांवड्यांचेर गुठलायले. हातूंत 7 जाणांक खातें लेगीत उगडपाक मेळ्ळें ना. ओलिपान बॅटान विध्वंस केलो जाल्यार मुकिसा एरिकान बाॅलिंगेंत जादू केली. ताणें 3.3 ओव्हरींनी फक्त 3 धांवड्यो दिवन 8 विकेटी घेतल्यो. तांकां 291 धांवड्यांनी विक्रमी जैत मेळ्ळें. एक इतिहास घडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
