भांगरभूंय | प्रतिनिधी
निमाणे इतलेंच सांगन दिसता. जें मेळ्ळा तातून समाधानी रावात. जें तुज्या नशिबाचें तें तुका मेळटलेंच. रडून दीस सारचे परस हांसत मुखान जीण सारची.
दिलां माऊली तुवें नांव, रंगान काळो जरी हांव,
म्हजे विणें तुका लागना थाव, म्हणटात पंढरपूर म्हजो गांव
म्हज्या भक्ता म्हाका वळखलो रे? हय हांवूच तो विठ्ठल, हांवूच तुजो विठोबा, हांवूच तुजो पांडुरंग, श्री हरी. ज्या नांवान उलो मारशी, तुका हांवूच दिश्टी पडटलों. उलो मारशी तूं म्हाका तुज्याच म्हऱ्यांत तुका दिसतलों. हांव कणाकणांत आसा. तुज्या विचारान, तुज्या काळजांत हांवूच आसा. कमरेर धरून हात लक्ष म्हजें सदांच भक्ता तुजेर, जितलो तुजो मोग म्हजेर तितलोच म्हजो जीव तुजेर. म्हजे खातीर तूं वारी करता, म्हजे खातीर तूं उपास धरता. तुजी ही निर्मळ भक्ती पळोवन जीव म्हजो धादोसता. तुज्या भक्तीची, पावित्र्याची फुलतात फुलां, दर वारकऱ्याची विठ्ठल नामान भरल्या मनां. भक्तीचे नदरेन पळयशी तुका हांवूच दिश्टी पडटलों. म्हाका तुजो पयसो नाका, म्हाका नाका तुज्यो त्यो वस्तू. हांव आसूसलां फक्त निसुवार्थ भक्तेक. म्हज्या भक्ता दर वर्सा म्हजी वारी करीत तूं पंढरपूराक म्हाका सोदीत येता. आपल्या घराब्याचो सोडून हुस्को, सादे जिवीत सादेपण घेवन आंगार, मेकळ्या पायांन, कपला वयलो घाम गळयत, उटंगराच्या पावसांत वारो आसू हुंवार आसूं तूं म्हाका मेळपाक येता. केन्ना झरता तुजी जोतीं केन्ना वतात पाया काती तरीय धांवत चलत म्हज्या भेटेक तूं येता. भक्ता खरेंच तूं भाग्यवान. ना तुका जिवीताची पर्वा ना कसली तुका खंत. म्हज्या भक्ता खंयच्यान हाडटा तुज्या भितर इतली ही शक्त?
ही म्हजी वारी म्हळ्यार एक परिक्षाच. हे वारयेक वेगवेगळ्यो अडचणी, आडखळीची वळेरी तुजी फाट सोडीना तरीय लेगीत तुजो दृढ निश्चय तूं कांय सोडीना. तुजी परिक्षा घेवंक म्हाकाय तितलीच मजा येता पूण तूं पास जालो कांय म्हजे खोशयेक शीम मेर नासता हें तितलेंच खरें. तुजीं गितां, अभंग आयकून हांवूय मंत्रमुग्ध जावन नाचतां.
तूं आसा भक्ता म्हूण हांव आसा. म्हजो भक्त ना जाल्यार हांव एकटो पडटलों. जशी आवय आपल्या भुरग्याचे वाटे कडेन दोळे लावन बसता तशेच म्हज्या भक्ताचेर हांव लावन बसता दोळे. ह्या देवाची काळजी तुकाच न्ही रे म्हज्या भक्ता? तूं केन्ना गा येता पंढरपूरा …..जीव आसूसता.. तुका कितेंय जाल्यार भक्ता…जीव हो घुस्मट्टा… तुजे भेटेक भुकेला रे…केन्ना दिश्टी पडटा… यो रे भक्ता बेगीन तुजे वाटेक दोळे लावन रावतां.
निमाणे इतलेंच सांगन दिसता. जें मेळ्ळा तातून समाधानी रावात. जें तुज्या नशिबाचें तें तुका मेळटलेंच. रडून दीस सारचे परस हांसत मुखान जीण सारची. बरें येता हांव, म्हजे भक्त म्हजी वाट पळयता आसतले…सुखी रावात, बरी जीण जगात…दीर्घ आयुष्य भव:
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
