भांगरभूंय | प्रतिनिधी
लखनौ, खबरां संस्था ः मोगान पडल्यार सगळें विसरपाक जाता, अशें म्हण्टात. मोगान खंय सगलें माफ अशेंय एक वाक्य आसा. अशीच एक घडणूक आतां उजवाडाक आयल्या. भुरग्यांचें लग्न जावचे पयलीं व्याही (न्हवऱ्याचो बापूय) आनी विहिण (व्हंकलेची आवय) एकामेकांच्या मोगान पडलीं आनी घरांतल्यान पळून गेलीं. हे घडणुकेक लागून दोनूय कुटुंबांत व्हड भावनीक वाद निर्माण जालां. ह्या प्रकरणांत व्हंकलेच्या बापायन न्हवऱ्याच्या बापायचेर पुलिशेंत कागाळ केल्या.
ही घडणूक उत्तर प्रदेशांतल्या कासगंजांतल्या डुंडवारा वाठारांत घडली. ह्या गांवांत पप्पूचे चलयेचें लग्न शकीलाच्या चल्या कडेन थारिल्ले. ताका लागून शकीलाचें परत परत पप्पूच्या घरा वचप वाडिल्लें. लग्नाची तारीख लागीं पावल्लीं म्हणून तयारी चालू आशिल्ली. तांचे मदींच शकील आपले जावपी सुनेच्या आवयच्या मोगांत पडलो आनी तिचे वांगडा पळून गेलो. ह्या प्रकरणांत पप्पून शकीला आड कागाळ केल्या. शकीलान म्हजे बायलेक फटोवन तिचें अपहरण केलां असो आरोप पप्पून केला.
मजगतीं पप्पू आनी शकील एकामेकांचे व्याही जावपाचे आशिल्ले. पूण ताचे आदींच शकील विहिणी वांगडा पळून गेलो. उजवाडाक आयिल्ले म्हायती प्रमाण, शकीलाक 10 भुरगीं आसात, जाल्यार विहिणीक स भुरगीं. ह्या प्रकरणांत पुलिसांनी गुन्यांव नोंद करून फुडली चवकशी सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
