भांगरभूंय | प्रतिनिधी
विधानसभेंत हावसींग बोर्डाची म्हायती
पणजी, प्रतिनिधी ः गोंयच्या तीन सुवातींनी हावजिंग बोर्डाचे नवे राबितो प्रकल्प येवपाचे आसात. एका प्रकल्पाचें काम २०२६ मेरेन पुराय जातलें आनी दोन प्रकल्पांचें बांदकाम अजून मेरेन चालीक लागपाचें आसा. ह्या तिनूय प्रकल्पांनी २५५ फ्लॅट येतले जाल्यार ३९ दुकानां येतलीं, अशी म्हायती गोंय हावजिंग बोर्डान विधानसभेचे लेखी जापेंत दिली.
अंबाजी फातोर्डा, कुडका आनी आणी कुर्टी फोंडें हे प्रकल्प येतले. अंबाजी फातोर्डा सेक्टर डी आनी इ भितर राबीतो तशेंच वेवसायीक प्रकल्प येतलो. ह्या प्रकल्पां भितर ९९ दोन बीएचके फ्लॅट, २८ तीन बीएचके फ्लॅट आनी १२ दुकानां येतलीं. ऑगस्ट २०२६ मेरेन हो प्रकल्प पुराय जातलो. कुडका राबीतो प्रकल्पांचे बांदकाम सुरू जावपाचें आसा. हातूंत ४० थ्री बीएचके आनी २ बीएचके २० फ्लॅटांचो आस्पाव आसा. गरजेची मान्यताय घेतले उपरांतूच ५४० दिसांनी ह्या प्रकल्पांचें काम हातांत घेतले. कुर्टी फोंडें प्लॉट नं. एफ आनी जी राबितो तशेंच वेवसायीक प्रकल्प येवपाचो आसा. ह्या प्रकल्पांत २६ तीन बीएचके, ४२ दोन बीएचके आनी २७ दुकानांचो आस्पाव आसा. गरजेची मान्यताय घेतले उपरांतच ५४० दिसांनी ह्या प्रकल्पाचें काम हातांत घेतले, अशी म्हायती हावजिंग बोर्डान दिली.
जाल्यार गोंयच्या खंयच्या सुवातींनी अजून मेरेन कितलीं दुकानां आनी फ्लॅटां रितीं आसात आनी तीं पावणे खातीर येवपाची आसात हाचीय म्हायती हावजिंग बोर्डान दिली. पर्वरे हावसींग बोर्ड कोलनींत ४० ते २७ स्क्वेअर मिटर इतलीं ३० दुकानां रितीं आसात जाल्यार रुमडामळ दवर्ले २९ स्क्वेअर मिटर इतलीं ३ दुकानां रितीं
आसात. जाल्यार रुमडामळ दवर्ले ५४ ते ४७ स्क्वेअर मिटर इतलीं ३५ फ्लॅटां रितीं आसात.
पर्वरे ९८ स्क्वेअर मिटर इतलीं १२ फ्लॅटां, सांकवाळे ३५ स्क्वेअर मिटर सात फ्लॅटां जाल्यार कोलवाळे ३५ स्क्वेअर मिटर एक फ्लॅट रितें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
