भांगरभूंय | प्रतिनिधी
पणजी: गोवा कोंकणी अकादेमीन २०२४-२०२५ ह्या अर्थीक वर्सा खातीर वेगवेळ्यो येवजण्यो जाहीर केल्यात आनी इत्सूक लेखक आनी प्रकाशकां कडल्यान अर्ज मागयल्यात.
येवजण्यो अश्यो: पयलो चंवर येवजण (लेखकाचें पयलें पुस्तक उजवाडावपाक ७५ टक्के अर्थीक पालव), साहित्य प्रभा येवजण (पुस्तक उजवाडावपाक ७० टक्के अर्थीक पालव), प्रतिभा सन्मान येवजण (प्रकाशन पालव- प्रकाशका कडल्यान जानेवारी ते डिसेंबर २०२३ मेरेनची पुस्तकां विकती घेवप), बाल साहित्य प्रकाशन येवजण (पुस्तक उजवाडावपा खातीर ७० टक्के अर्थीक पालव), कोंकणी नाटक मांड येवजण (पुस्तक उजवाडावपा खातीर ७५ टक्के अर्थीक पालव), लोकवेद पुस्तक प्रकाशन येवजण (लोकवेदाची पुस्तकां उजवाडावपा खातीर ७० टक्के अर्थीक पालव) आनी शिक्षणीक साहित्य प्रकाशन येवजण (शिक्षणीक पुस्तकां प्रकाशीत करपा खातीर ७० टक्के अर्थीक पालव).
तशेंच इत्सूक संस्था आनी विद्यार्थ्यां कडल्यान फुडल्या येवजण्यां खातीर अर्ज मागयल्यात. शिक्षणीक, बाल साहित्य, लोकवेद, अणकार, संगीत ह्या विशयांचेर कृतीसत्रां/ शिबिरां आयोजना खातीर अर्थीक पालव, लेखक तुमचे भेटेक आनी विद्यार्थी लेखकांचे भेटेक (शिक्षणीक मळां वयल्या संस्थांनी अर्ज करप), कोंकणी शिक्षणीक शिश्यवृत्ती ( बी. ए./ एम. ए./ पिएचडी. पांवड्यार शिकपी विद्यार्थ्यां खातीर शिश्यवृत्ती), कोंकणी संगीत कार्यावळ निर्मिती (संगीत क्षेत्रांत कार्य करपी संस्था कडल्यान अर्ज), लोकवेद संशोधनवृत्ती/ लोकवेद प्रकल्प (दस्तायेवजीकरणा खातीर आनी संशोधना खातीर अर्थीक पालव).
वयल्या येवजण्यांची अर्जीपत्रां अकादेमीच्या गोवा संचार भवन, बी. एस. एन. एल. बिल्डिंग, ५वो माळो, पाटो पणजी गोंय हांगच्या कार्यालयांत उपलब्ध आसात. इत्सुकांनी अर्ज बरोवन दिवपाची निमाणी तारीख ३० जुलय मेरेन आसा. हेर म्हायती खातीर अकादेमीच्या ७७७५८९१८५७ ह्या नंबराचेर संपर्क करचो वा कार्यालयांत भेट दिवची, अशें अकादेमी वतीन कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
