भांगरभूंय | प्रतिनिधी
पणजी, खबरां मेज: गोंय सरकाराच्या कला आनी संस्कृती संचालनालया वतीन कला सन्मान येवजणेची अंमलबजावणी करता. हे येवजणे खाला गरजू ज्येश्ठ कलाकारांक म्हयन्याक २५००/- रूपया आनी गोंय राज्य सांस्कृतीक पुरस्कार फावो जाल्ल्या कलाकारांक म्हयन्याक ३२००/- रूपया अर्थीक मजत दितात. पूण हे येवजणे खाला अर्थीक मजत स्विकारपाची कलाकारांची तयारी आसपाक जाय आनी ते कसलेंच सरकारी पेन्शन घेवपी आसपाक जायनात.
कला सन्मान येवजणे खातीर अर्ज करपा वेळार कलाकाराक पिरायेचीं ६० वर्सां पुराय जाल्ली आसपाक जाय. गरजू ज्येश्ठ कलाकाराची वर्सुकी येणावळ ४८,०००/- वयर आसपाक फावना. कलाकारान कला आनी संस्कृतीच्या मळार योगदान दिल्लें आसपाक जाय वा वावर केल्लो आसपाक जाय. हे येवजणे खाला दर वर्सा निधी उपलब्ध आसा ते प्रमाण कलाकारांचे अर्ज अर्थीक मजती खातीर मंजूर करतात.
कला सन्मान येवजणे खातीर ह्या वर्सा सावन ऑनलायन अर्ज स्विकारपाची सुविधा सुरू करता. कलाकार हे येवजणे खातीर घरा बसून गोवा ऑनलायन सर्व्हिस पोर्टल https://goaonline.gov.in वयल्यान अर्ज करपाक शकतात. तशेंच कलाकार लागींच्या CSCs/VLEs केंद्राचेर भेट दिवपाक शकता. उत्तर गोंयांत १७७ आनी दक्षीण गोंयांत १८० मेळून गोंयभर ३५७ अशीं केंद्रां आसात. कलाकारान अर्जा वांगडा आवश्यक दाखले जोडपाक जाय. कलाकार १४४७१ ह्या टोल फ्री नंबराचेर फोन करून लागींच्या CSCs/VLEs केंद्राची म्हायती मेळोवंक शकता. तशेंच कलाकार ग्रामीण मित्रा कडेन संपर्क करपाक शकतात.
कला सन्मान येवजणेचे अर्ज https://goaonline.gov.in चेर ११ जुलय ते २३ ऑगस्ट मेरेन उपलब्ध आसतले. चड म्हायती खातीर कलाकारांनी कला आनी संस्कृती संचालनालय, पाटो पणजी हांगा भेट दिवची वा ०८३२-२४०४६१४ ह्या फोन नंबराचेर संपर्क करचो.
मजगतीं, कला सन्मान येवजणेच्या सगळ्या लावधारकांनी राजपत्रीत अधिकार्यान सय केल्लो हयातीचो दाखलो वर्साक दोन फावट म्हणजे एप्रिल आनी ऑक्टोबर म्हयन्यांत संचालनालयाक सुपूर्द करपाक जाय,अशें कला आनी संस्कृती संचालनालयान कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
