राज्यांत पावसाचो सांवारः अंजुणे धरणांतल्यान उदक सोडलें

भांगरभूंय | प्रतिनिधी

पणजीः फाटल्या तीन दिसा सावन राज्यांत पावसाचो सांवार सुरुच आसा. वेगवेगळ्या सुवातीनी झाडां पडप, रस्ते उदका पोंदा वचप, पालसणां कोसळप प्रकार चालूच आसा.
आयज सकाळीं खारेबांद- मडगांवां घर कोसळून कुर्दोस परेरा ही बायल जखमी जाली. तिचेर दक्षीण गोंय जिल्हो हॉस्पिटलांत उपचार सुरू. जाल्यार मार्ले बड्डें, फातोड्डें पावसाक लागून राखणे वणत निवासी इमारतीचेर कोसळून पयल्या आनी दुसऱ्या मजल्या वयल्या फ्लॅटांचें लुकसाण जालें. उटंगराच्या पावसाक लागून न्हंयांक हुवार आयलां. राज्यांतली कांय धरणां ओव्हरफ्लो जाल्यात.
सेगीत तीन दीस पडपी पावसाक लागून आयज दनपारा अंजुणे धरणांत उदकाची पातळी 90 मिटरां वयर पावली. ताका लागून चारुय दारां उक्तीं करून उदक भायर सोडलें. केरी, मोर्ले, पर्ये, सांखळे, सर्वण- कारापूर वाठारांत न्हंयेंतल्या उदकाची पातळी वाडुं येता.
राज्यांत सांजवेळार घोग्यांनी पावस पडपाची शक्यताय आशिल्ल्यान हवामान खात्यान रेड अलर्ट जारी केला. जाल्यार फाल्या ऑरेंज अर्लट दिला. फाटल्या 24 वरांत राज्यांत 120.7 मिमी म्हळ्यार 4.75 इंच पावसाची नोंद जाल्या. काणकोणां सगळ्यांत चड 7.32 इंच (186 मिमी) जाल्यार पणजे 6.97 इंच (177 मिमी) पावसाची नोंद जाल्या.
गोंयांत 1 जून ते 16 जुलय सकाळीं मेरेन 83.98 इंच (2133.3 मिमी) पावसाची नोंद जाल्या. सरासरी परस हो पावस 45 टक्के चड आसा. वाळपय सगळ्यांत चड 95.41 इंच, ताचे उपरांत सांग्यार 95.18 इंच, सांखळे 92.41 इंच, काणकोणां 87.76 इंच, फोंडें 87.36 इंच, पेडणें 87.01 इंच आनी केपें 84.74 इंच पावसाची नोंद जाल्या. पावस जुलय सोंपता म्हणसर इंचाची शंभरी हुपतलो अशें सध्या तरी दिसता.