पंढरपुराक वतना जाल्ल्या अपघातांत पांच जाणांक मरण; सात जाण जखमी

भांगरभूंय | प्रतिनिधी

पनवेल, खबरां संस्था: मुंबय- पुणे म्हामार्गार पनवेल पसून साडेपांच किलोमिटर अंतराचेर खाजगी बस आनी ट्रॅक्टराचो अपघात जावन पांच जाणांक मरण आयलें. जाल्यार ह्या अपघातांत सात जाण जखमी जाले. खाजगी बस डोंबिवलीच्यान आषाढी एकादशी निमतान पंढरपुराक वताली.

डोंबिवलीच्यान चार बसी पंढरपुराक गेल्ल्यो. तांतले एके बसीच्या फुडल्यानच्यान वतालो तो ट्रॅक्टर दिसूंक नाशिल्ल्यान बसीन ट्रॅक्टराक बरोच नेटान धपको दिलो आनी बस २० फूट सकयल गेली. हातूंत बसींतले सात प्रवासी जखमी जाले. तांचेर हॉस्पिटलांत उपचार सुरू आसात. जाल्यार तीन भाविकांक जाग्यारूच मरण आयलें तशेंच टँकरांतल्याय दोगा प्रवाशांक मरण आयलें. हेर ४२ भावीक किरकोळ जखमी जाल्यात.

अपघातांत मरण आयिल्ल्यांचीं नांवां गुरुनाथ बापू पाटील, रामदास नारायण मुकादम, होसाबाई पाटील अशीं आसात. जाल्यार ट्रॅक्टरांतल्या दोगांक मरण आयिल्ल्यांचीं आजून वळख पटूंक ना. पुलिसांनी पंचनामो केलो.