विधानसभेंतूय गडगड शक्य !

भांगरभूंय | प्रतिनिधी

पावसाळी अधिवेशनांत पयल्याच दिसा सुरवेकूच कांय प्रमाणांत गडगड मारिल्ल्याचें दिसून आयलें, आनी सभापती रमेश तवडकार हांणी ‘रेड अॅलर्ट’ दिवन कामकाजाक एका वराची सुटी दिली.

गोंयांत सद्या सगले कडेन घोग्यांनी पावस पडत आशिल्ल्यान लोकजीण विस्कळीत जाल्ल्याचें चित्र दिसून येता. वादळी
पावसाचो खवदळ सुरूच आशिल्ल्यान काल सोमारा परतून एकदां शाळांक सुटी दिवपाचो निर्णय सरकाराक घेवचो पडलो. गोंयचो पावस म्हणटकच वादळी वारें, गडगड, जोगलां, हुंवार हें सगलें आयलेंच. आतां गोंय विधानसभेच्या पावसाळी अधिवेशनांतूय सभाघरा भायर घोग्यांनी पडपी पावसाचो कितलो मेरेन परिणाम जाता हें कळप कठीण आसलें तरी काल विधानसभेच्या पावसाळी अधिवेशनांत पयल्याच दिसा सुरवेकूच कांय प्रमाणांत गडगड मारिल्ल्याचें दिसून आयलें, आनी सभापती रमेश तवडकार हांणी ‘रेड अॅलर्ट’ दिवन कामकाजाक एका वराची सुटी दिली. म्हळ्यार पयल्याच दिसा प्रस्न-जापेचें वर ह्या गडगडान सभाघरांत निर्माण जाल्ल्या तापिल्ल्या वातावरणाक लागून हवेंत विरून गेलें. पावसाळी अधिवेशनांतलें कामकाज हें सुरवेकूच अशें गोंदळ आनी गडबड जावन व्हांवून वता आसत जाल्यार णव ऑगस्ट मेरेन चलपी ह्या अधिवेशनांत सरकार विरोधकांच्या अश्या गडगडाटांत आनी कडकडाटांत कामकाज चलोवपाचें आव्हान कितलें मेरेन पेलूंक शकतलें हो प्रस्न आसा. पोरूं वर्सा ह्याच काळांत अर्थसंकल्पीय अधिवेशन चालू आसतना विधानसभेंत कडकड आनी गडगड आनी ल्हान व्हड वादळांय आयलीं आनी ताचो विपरीत परिणाम कामकाजाचेर जाल्लो. ह्या वेळार विरोधक उणे संख्येन आसून लेगीत ते सरकाराची खूबश्या प्रस्नांचेर कोंयडी करपा खातीर तयार आशिल्ल्याचें चित्र कालच्या अधिवेशनाच्या पयल्याच दिसा दिसून आयलें.
अधिवेशनाचो पयलो दीस म्हळो की कामकाज शांततायेन पार पडटलें अशी अपेक्षा आसता. पूण काल मात वेगळेंच चित्र दिसून आयलें. मुखा वेले 17-18 दीस सभाघरांत कशें कामकाज चलतलें हाची एक झलकूच पळोवंक मेळ्ळी. पूण पयल्या दिसा मात सरकार पक्षा कडल्यानूच विरोधकांक घेरपाचो यत्न जालो आनी तातूंतल्यानूच सभाघरांत निर्माण जाल्ल्या गोंदळाचे निमित्त करून सभापतींनी कामकाजाक एका वराची सुटी दिवन उडयली. विरोधकांक घडये सरकाराचो हो गेम कळ्ळो आसुये. आतां विरोधक ताची जाप कशे पद्दतीन दितात हें फुडल्या कांय दिसांनी दिसून येतलें.
केपेंचे काँग्रेसीचे आमदार एल्टन डिकॉस्टा हांणी सभापती रमेश तवडकार हांचो अपमान केल्ल्याचो आरोप करून तांणी सभापतींची माफी मागची अशी मागणी करीत वास्कोचे आमदार कृष्णा साळकार हांणी सुरवेकूच एल्टन डिकॉस्टा हांचे आड हक्कभंग थाराव मांडपाचेर आग्रो धरलो. ताका सरकार पक्षाच्या आमदारांनी तेंको दिवन सभापतींचो अपमान आमी खपोवन घेवचे नात अशें सांगून सभाघरांत कृष्णा साळकार हांचें समर्थन केलें. विरोधकांक तर विशय नेमको कितें आसा हें कळून येवचे पयलींच सभापतींनी कामकाज अर्द वरा खातीर तहकूब केलें. कामकाज परतून सुरू जालें तेन्ना प्रस्न जापेचें वर सोंपिल्लें तेन्ना बोवाळाक कारण थारिल्लो विशय फाटीं पडिल्लो. पावसाळी अधिवेशनांत सरकार पक्षाचे वटेनूच तयार जाल्लें हें वादळ एका वरा उपरांत शांत जालें. तरी फुडल्या कांय दिसांनी विरोधकांचे वटेन अशीं खूबशीं ल्हान व्हड वादळां सभाघरांत धपको दिवपाची शक्यताय न्हयकारूं येवची नात. सरकाराक अश्या वादळांक तोंड दिवपा खातीर तयार रावचें पडटलें.
लोकसभा वेंचणुके उपरांत पयलेच फावटी गोंय विधानसभेचें अधिवेशन जायत आसा. दक्षीण गोंयची सुवात जिखिल्ल्यान विरोधकांचें नैतीक बळ खूबशें वाडलां. सरकार पक्षा कडेन सभाघरांत व्हड संख्येन भोवमत आसलें तरी विरोधी पक्ष फुडारी युरी आलेमांव हांच्या फुडारपणा खाला विरोधी पक्षान थारायत आनी एकवटान सरकाराक घेरपाचो पवित्रो आपणायत जाल्यार सरकाराची ह्या अधिवेशनांत कोंयडी जावंक शकता हें मान्य करचेंच पडटलें. पूण तीन-चार पक्षां मदीं विभागिल्लो विरोधी पक्ष एकवट दाखोवंक शकतलो? हाचेरूय खूबशे निंबून आसतलें. युरी आलेमांव हे स्वता वर्स देड वर्सांत खूबशे परिपक्व जाल्यात हें फाटल्या अधिवेशनांत तांणी प्रभावी कामगिरी करून सिद्ध केलां. गोवा फॉरवर्डाचे विजय सरदेसाय हांचोय तांकां बरे पैकीं तेंको मेळटलो हातूंत दुबाव ना. पूण मुख्यमंत्री डॉ. प्रमोद सावंत हेवूय कितें कमी नात. ते विरोधकांक गरजे भायर आपले तकलेर बसोवन घेतले? विरोधकांची दरेक चाल कितें आसतली हाचो पयलींच अदमास घेवन ताका तितलेच समर्थपणान तोंड दिवन खंयच्याय संकश्टांक सामकार वचपा इतले ते निश्चितूच धूर्त आसात. ताका लागून अशा वेळार विरोधक, सरकाराक ह्या अधिवेशनांत अडचणींत हाडपा खातीर नेमको कसलो पवित्रो घेतले आनी ते सरकाराक घेरपाक येसस्वी थारतले काय ना हाची जाप कांय दिसां भितर मेळटली. ‘इंडी’ आघाडी गोंयांतूय तितलीच कार्यक्षम आसा हें सिद्ध करपा खातीर काँग्रेस, गोवा फॉरवर्ड, आप, जीआरपी ह्या चार पक्षांच्या आमदारांक एकवटाच्या नव्या अध्यायाची सुरवात करची पडटली. जाका लागून फुडारांत भाजपा कडेन दोन हात करतना ताची तांकां मजत जावंक शकतली.
विरोधकांक सभाघरांत ल्हान व्हड वादळां निर्माण करपाचीच आसत जाल्यार तांचे कडेन अशा प्रस्नांचो अजिबात उणाव ना. कला अकादमीचो प्रस्न तर विजय सरदेसाय आनी हेर विरोधी फुडाऱ्यां कडेन अशें अस्त्र आसतलें की सरकाराक ह्या वादळांतल्यान सांवरपा खातीर खूबशी सर्कस करची पडटली. हो विशय विरोधक सभाघरांत नेमको कसो हाताळटात हाचे कडेन गोंयच्या कलाकारांचे लक्ष लागून आसा हें मान्य करचेंच पडटलें. सरकाराक कला अकादमी विशीं ह्या अधिवेशनांत ठाम अशें आस्वासन दिवचेंच पडटलें आनी ते खातीर विरोधकांचें चेपण म्हत्वाचें थारतलें. पुलीस म्हासंचालक जसपाल सिंग हांची गोंयच्यान बदली करपाक मुख्यमंत्री डॉ. प्रमोद सावंत येसस्वी थारिल्ल्यान हें वादळ खंबीरपणान परतावन लावपाक सरकाराक मजत जातली. पूण अशे खूबशे प्रस्न ह्या प्रकरणांत लिपून उरल्यात जाच्यो जापो सरकाराक सभाघरांत दिवच्योच पडटल्यो. विरोधी आमदारांचो एकवट जावचो न्हय हे खातीर सरकार प्रयत्नशील आशिल्ल्याचो आरोपूय जायत आसा. पूण ताका नेमको कसलो आधार आसा हें मात कळना. मुरगांव बंदरांतल्या म्हालाच्या येरादारीक थळाव्या आमदारां कडल्यान जावपी हस्तक्षेप आनी ताका लागून बुडिल्लो कोट्यांनी रुपयांचो महसूल हें ताजें प्रकरणूय सभाघरांत ल्हान काय जायना वादळ निर्माण करूंक शकता आनी ताची झलक विजय सरदसाय हांणी पयल्याच दिसा दाखयली. वाडटी बेरोजगारी, शेत जमनींचें मनमानी रुपांतरण, भ्रश्टाचार अश्या खूबश्या आनी जायत्या विशयां वेल्यानूय विरोधक आक्रमक जातले हातूंत दुबाव ना. भर पावसांतूय हाका लागून सभाघरांतलें वातावरण कायम तापत रावंक शकता.

वामन प्रभू
9823196359