भांगरभूंय | प्रतिनिधी
स्पेनान विक्रमी चवथे खेपे युरो करंड फुटबॉल सर्त जिखली. हांगाच्या ऑलम्पिया स्टेडियमार जाल्ले फायनलींत ताणें इंग्लंडाक 2-1 असो हारयलो.
90 मिनटांच्या खेळांत स्पेना खातीर निको विलियम्सान 47व्या मिनटाक आनी बदली खेळगडो मिकेल ओयारजाबलान 86व्या मिनटाक गोल केलो. इंग्लंडा वतीन एकोडो गोल कोल पामरान 73व्या मिनटाक केलो.
इंग्लंडाक सेगीत दुसरे खेपे फायनलींत हार घेवची पडली. 2020त घरच्या मैदानाचेर खेळटना ताका इटली कडल्यान हार घेवची पडिल्ली.
स्पेनान ह्या जैता सयत विक्रमी चवथे खेपे करंडाचेर नांव कोंतरायलें. ताच्या उपरांत जर्मनीचो क्रम लागता. जर्मनीन तीन खेपे ही सर्त जिखल्या. जर्मनीन निमाणे खेपे 1996त ही सर्त जिखिल्ली.
युरो करंड सर्तीक 1060त सुरवात जाल्ली. फ्रान्सांत जाल्ली पयली सर्त सोव्हियत युनियनान जिखिल्ली. फायनलींत ताणें युगोस्लावियाक हारयिल्लो. 1960 ते 1976 मेरेन चारूच पंगड वांटो घेताले. जाल्यार 1980 मेरेन फायनली वांगडा तिसरे सुवाते खातीर लेगीत लडत जाताली. 1980त पंगडांची संख्या वाडोवन चारा वयल्यान आठाचेर पावली. 1992त मेरेन फकत आठूच पंगड वांटो घेताले. पूण, 1996त परतून एकदां पंगडांचे संख्येत वाड केली आनी आठा वयल्यान 16 मेरेन पावयली. ते उपरांत 2016 सावन 24 पंगड वांटे घेतात.
संवसारीक फुटबॉल सर्ती उपरांत युरो करंड सर्त व्हड फुटबॉल सर्त आसा. दर चार वर्सांनी जावपी ही सर्त कोरोनाक लागून 2020 बदला 2021त खेळयिल्ली.
यामलान मोडलो पेलेचो विक्रम
व्हड आंतरराष्ट्रीय सर्तीचे फायनलींत खेळपी स्पेनाचो लामिने यामल हो सगल्यांत उण्या पिरायेचो खेळगडो थारलो. लामिनेची पिराय 17 वर्सां आनी 1 दीस अशी आसा.
लामिनेन म्हान फुटबॉल सर्गेस्त पेलेचो विक्रम मोडलो. 1958त संवसारीक फुटबॉल सर्तीचे फायनलींत खेळपी पेलेची त्या वेळार 17 वर्सां 249 दीस अशी पिराय आशिल्ली. जाल्यार लामिने हो पेले परस 248 दिसांनी ल्हान आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.