भांगरभूंय | प्रतिनिधी
मडगांव: नेटाच्या पावसाक लागून दोवंडे फातोड्ड्यां शशी नायक हांच्या घरांतल्यो दोन वण्टी मोडून पडपाची घडणूक घडली. तशेंच फातोड्ड्यां सकाळीं रेमेडिअस फर्नांडीस हांच्या घराची मुखा वेली वणत माेडून पडपाची घडणूक घडली. घराचे कुशीक सांचिल्लें उदक उजो पालोवपी दळान वाट करून सोडून दिलें. झाडां पडिल्ल्यान घरां सयत राखणे वण्टीचें एका लाखाचें लुकसाण जालें.
पावसाक लागून पडझड जावपाच्यो घडणुको सोमाराय घडल्यो. मडगांव उजो पालोवपी दळा कडल्यान मेळिल्ले म्हायती प्रमाण, सिर्ली नावेली दांडोवाड्यार रस्त्यार माड पडलो. घोगळ मडगांवां बोलशे सर्कला कुशीक राखणे वण्टीचेर माड पडिल्ल्यान 20 हजारांचें लुकसाण जालें. जाल्यार 10 हजारांची मालमत्ता वाटायली. नावेली झेवियर कपेला कुशीक रबराचें झाड लायटीच्या सरयांचेर पडून लायटीच्या खांब्या सयत राखणे वणत पडली. हातूंत सुमार 40 हजारांचें लुकसाण जालें.
नावेली भलायकी केंद्रा कुशीक, कोलमोरोड नावेलीतले गॅरेजी कुशीक, दोंगरी नावेली हांगासरल्या भितरल्या रस्त्यार झाड पडून येरादारीक आडखळ जाली, मुंगूल मडगांवां ब्ल्यू हेवन रॅस्टोरंण्टा कुशीक घराचेर झाड पडून लुकसाण जालें. तशेंच फातोड्डें शारदा क्लासीक रॅस्टोरंण्टा कुशीक मातयेच्या घराच्यो वण्टी कोसळ्ळ्यो. हातूंत सुमार 50 हजारांचें लुकसाण जालें जाल्यार एक लाखाची मालमत्ता वाटावपाक येस आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
