भांगरभूंय | प्रतिनिधी
स दिसांच्यान समस्या; पियेवपाक पावसाच्या उदकाचो वापर
भांगरभूंय । प्रतिनिधी
वाळपयः एके वटेन उटंगाराचो पावस पडटा, जाल्यार दुसरे वटेन झर्मे गांवांत फाटल्या स दिसांच्यान पियेवपाच्या उदकाचो उणाव निर्माण जाला. ह्या गांवांतले लोक सध्या तरी पावसाच्या उदकाचो वापर पियेवपा खातीर करतात, अशी गजाल उजवाडाक आयल्या. थळावे भौशीक बांदकाम खात्याच्या उदका पुरवण खात्याच्या एकंदर कारभाराचेर खर तिडक उक्तायतात. फाटल्या दोन म्हयन्यांच्यान खूब खेपे ह्या गांवांत पियेवपाच्या उदकाची समस्या उप्रासल्या. तरी लेगीत भौशीक बांदकाम खात्याच्या उदका पुरवण विभागाचे अधिकारी मात हातार हात दवरून बसल्यात, असो आरोप झर्मे गांवांतल्या लोकांनी केला.
मेळिल्ले म्हायती प्रमाण फाटल्या दोन म्हयन्यांच्यान म्हावूस पंचायतींतल्या झर्मे गांवांत सदांच पियेवपाच्या उदकाची समस्या निर्माण जाता. थळाव्या लोकांनी तिडक उक्तायले उपरांत अधिकारी थंय येवन तात्पुरती वेवस्था करतात. मात सासणाची सुविधा अजून मेरेन तरी उपलब्ध करून दिवंक ना. फाटल्या स दिसांच्यान ह्या गांवांत पियेवपाच्या उदकाचो उणाव निर्माण जाला. एके वटेन घोग्यांनी पावस पडटा जाल्यार दुसरे वटेन पियेवपाच्या उदका खातीर लोकांक वळवळे काडचे पडटात. हे खातीर गांवच्या लोकांनी खर तिडक उक्तायल्या.
थळाव्या लोकांनी दिल्ले म्हायती प्रमाण, फाटल्या स दिसांच्यान ह्या वाठारांतल्या नळांक येवपी उदक बंद जालां. हे विशींच्यो कितलेशेच खेपे कागाळी केल्यात, मात ते कागाळींची अजून मेरेन दखल घेवंक ना. ताका लागून ह्या गांवांत गंभीर परिस्थिती निर्माण जाल्या.
ह्या गांवांतल्या बायलांनी दिल्ले म्हायती प्रमाण पियेवपाच्या उदकाची समस्या निर्माण जाल्ल्यान व्हड समस्येक फुडो करचो पडटा. खावपा जेवपा खातीर पडपी पावसाचें पावळेंतल्यान गळपी उदकाचो वापर करचो पडटा.
सत्तरी म्हालांत अशे तरेची परिस्थिती उप्रासप ही खऱ्यांनीच हुस्क्याची गजाल. उदका पुरवण विभागान ताकतिकेन उदका पुरवण सुरळीत करची, अशी मागणी थळाव्या लोकांनी केल्या. उदकाचे समस्ये विशीं साबार खेपे थळावी आमदार डॉ. देविया राणे हांकां कळयतात. आमदारान अधिकाऱ्यां कडेन संपर्क केल्यार ते आमदाराक चुकीची म्हायती दितात, असो आरोप थळाव्या लोकांनी केला. गांवांतली उदका पुरवण बंद आसून लेगीत ते अधिकारी उदका पुरवण सुरळीत चालू आशिल्ल्याचें आमदारांक सांगतात. हे खातीर आमदारान भौशीक उदका पुरवण खात्याच्या अधिकाऱ्यांक घेवन ह्या गांवाक भेट दिवची आनी एकंदर परिस्थितीची पळोवणी करची, अशे तरेची विनवणी गांवच्या लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
