भांगरभूंय | प्रतिनिधी
न्हंयेदेगे वयल्या गांवांक सादुरकायेची शिटकावणी
भांगरभूंय । प्रतिनिधी
दिवचलः महाराष्ट्र- गोंय राज्यांचो संयुक्त प्रकल्प आशिल्ल्या दोडामार्ग म्हालांतल्या तिळारी धरणाची पातळी पुराय जाले उपरांत धरणांतलें अतिरिक्त उदक कोनाळ पुच्छ कानालांतल्यान तिळारी न्हंय पात्रांत दाखल जालें. सोमारा फांतोडेर 4.10 वरांच्या सुमाराक विसर्ग सुरू जालो.
तिळारी धरण वाठारांत पावस वाडलो जाल्यार विसर्गांत वाड जातली. ताका लागून तिळारी न्हंयेदेगे वयल्या गांवांत तशेंच पेंडणें, दिवचल म्हालांतल्या न्हंयांदेगे वयल्या गांवांक सादुरकायेची शिकटावणी शिंपणावळ विभाग सिंधुदुर्ग तशेंच गोंय हांचे वतीन दिल्या.
तिळारी कानाल विभाग कार्यकारी अभियंते विनायक जाधव हांणी कालूच ह्या संबंदांत उलो मारिल्लो. तशेंच शिंपणावळ विभागा वतीन न्हंयेदेगे वयल्या गांवांत सायरन वाजोवन तशेंच लावडस्पिकर लावन उदकाचो विसर्ग सुरू जातलो, हाची म्हायती दिल्ली. दोडामार्ग म्हालांत फाटले दोन दीस घोग्यांनी पावस पडटा. ताका लागून लोकजीण विस्कळीत जाल्या. धरण वाठारांत व्हड प्रमाणांत पावस पडला. ताका लागून धरणाची अतिरिक्त उदक भायर वचपाची पातळी पुराय जाल्या आनी अतिरिक्त उदक भायर वचपाक सुरवात जाल्या. हे खातीर तिळारी न्हंयेच्या पात्रांत उदक वाडटलें. ते खातीर कोणूय न्हंयेर कपडे उमळपाक वा गोरवांक घेवन वचचें न्हय. न्हंय पात्रांत आशिल्ले पूल कॉजवे उदका पोंदा आसतना कोणेच वच्चें न्हय, असो उलो शिंपणावळ विभागान मारला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
