भांगरभूंय | प्रतिनिधी
मुंबय, खबरां संस्था ः कॅम्लिन ग्रुप ऑफ इंडस्ट्रीजचे मुखेली आनी हजारांनी कुटुंबांक रोजगार दिवपी उद्देजक सुभाष दांडेकार आयज (15 जुलय) सकाळीं सुमार सात वरांचेर संवसाराक अंतरले. आयज दनपारां 3.30 वरांचेर दादरांतल्या शिवाजी पार्क मसणभुंयेंत तांचे कुडीचेर निमणे संस्कार केलें.
सुभाष दांडेकार हे चित्रकला साहित्याचे उत्पादन करपी कॅम्लिन ग्रुप ऑफ इंडस्ट्रीज हे संस्थेचे संस्थापक आशिल्ले. शाळेंतल्या विद्यार्थ्यां खातीर लागपी गणितीय उपकरणां, पेन्सिल, मार्कर, शाय, कंपास आदी सयत चित्रकार आनी हेर कलाकारां खातीर लागपी सगळ्या तरांचीं साहित्यां, ऑफिसांतलीं उत्पादनां आनी वेवसायीक उत्पादनां फाटली जायत्या वर्सा सावन ह्या कंपनींत तयार करता.
ही कंपनी जायतीं वर्सां चलयतना दांडेकर हांणी उत्पादनांच्या दर्ज्याचेर आनी मोलाचेर केन्नाच तडजोड करूंक ना. काळा प्रमाण बदलिल्ल्या तंत्रगिन्यानाचो पुराय उपेग करून सतत नवनिर्माणाचेर तांणी भर दिलो.
सुभाष दांडेकर हांणी महाराष्ट्र चेंबर ऑफ कॉमर्साचे अध्यक्ष म्हणूनय काम केलें. तांच्या अध्यक्षपदाच्या काळांत महाराष्ट्र चेंबर ऑफ कॉमर्सान राज्यांतल्या वेपार आनी उद्देगधंद्याची वाड करपा खातीर जायते नवे उपक्रम सुरू केल्ले. तांच्या मरणा उपरांत एक व्हड उद्देजक आनी रंगांचो जादूगार गमवल्याची भावना उद्देग मळार उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
