दर्यादेग वाठारांतल्या मुखेल रस्त्यांचेर बेगीनूच स्पीड लिमीट : गोवा कॅन

भांगरभूंय | प्रतिनिधी

रस्तो सुरक्षा समितीचे बसकेंत थाराव

पणजी, प्रतिनिधी : दर्यादेग वाठारांतल्या मुखेल रस्त्यांचेर स्पीड लिमीट घालपाचे सोमारा जाल्ले रस्तो सुरक्षा समितीचे बसकेंत थाराव जालो. सध्या स्पीड लिमीट नाशिल्ले कारणान पर्यटक हडबडीत गाडयो चलोवन अपघात करतात, अशें गोवा कॅन एनजीओचे मुखेली रोनाल्ड मार्टीन्स हांणी सांगले.
अतिरिक्त जिल्होधिकाऱ्यान पणजे आपल्या कचेरेत रस्तो सुरक्षा समितीची बसका आपयिल्ली. हे बसके वेळार गोवा कॅन एनजीओ सयत पुलीस, येरादारी, भौशिक बांदकाम आनी हेर खात्याचे अधिकारी हजर आशिल्ले.
बारीक रस्ते सोडून जे मुखेल रस्ते दर्यादेग वाठारांक जोडतांत जशे की कांदोळें ते हणजूणां ह्या रस्त्यार अजून स्पीड लिमीट ना. खुपशे पर्यटक आपल्यो गाडयो आनी रेंट अ कार घेवन कश्याकशोय चलयतात मागीर अपघात जातात, दुसऱ्यांच्या दुरगार गाडयो मोखतांत. स्पीड लिमीट थारावन एका पॉयंटाचे तखटे लायतले आनी उपरांत कायद्याचे उल्लंघन करप्यांचेर कारवाय जातली, अशें रोनाल्ड हांणी सांगलें.
सगळे घटक जशें की भलयाकी, शिक्षण, ट्रॅफिक, येरादारी आनी भौशिक बांदकाम ही खाती एकठांय येवन जिल्लो रस्तो सुरक्षा आराखडो तयार करतले. अपघाता उपरांत जावपी मरणांचेर ह्या आराखड्यां वरवीं नियाळ घेतले, अशेय रोनाल्ड हांणी सांगलें.
दरेक तालुक्यांनी एक सुवात निवडून थंय अपघात जावन लोकांक मरण कित्याक येता हाचे विश्लेशण थळावें पुलीस स्टेशन आनी बांदकाम खाते करतले. हॅल्मेटाचो वापर करुंक ना, हेल्मेट सामके वापरूंक ना, पियेवन गाडी चलयता, गाडी नेटान चलयता ह्या सारकिल्ली कितलीशीच कारणां अपघातां खातीर जापसालदार आसात आनी ताचेर कसली उपाय येवजण करप हे आमकां कळटलें, अशी म्हायती मार्टीन्स हांणी दिली.
म्हामार्गाच्या कामांक लागून बस स्टॉप बदलल्यात देखून सर्विस रोडांचेर सुवात सोदून थंय बस स्टॉप करपाक आमी सांगलां. जायत्या वेळार लोक सर्विस रोडार बशींची वाट पळयतात पूण ती हायवेवेल्यान गेल्ले कारणान लोकांक चलून फुडें जंक्शनार बस धरची पडता, अशे मार्टीन्स हांणी सांगले.
ते भायर पणजे ज्यो नव्यो इव्ही बशीं घाल्यात तांचे सारके वेळापत्रक काडूंक ना. वेळापत्रक नासल्यार कोणूच ह्यो बशीं वापरचे नात. देखून वेळापत्रक गरजेचें अशें, रोनाल्ड हांणी सांगलां.