भांगरभूंय | प्रतिनिधी
न्यूयॉर्क, खबरां संस्था ः अमेरिकेंत भारतीय संस्कृतायेची प्रतिश्ठा वाडत आसा. 50 राज्यांतल्या 25 राज्यांनी हिंदू संस्कार शिबिरां कार्यरत आसात. अमेरिकेंत भारतीयांच्या भुरग्यांक धर्म आनी संस्कृतायेची वळख करून दिवप हो तांचो हेत आसा. ह्या शिबिरांत पयलेच खेपे दोन हजार गोऱ्या चलयांनी वांटो घेतलो. वट्ट सुमार 15 हजार शाळेचीं भुरगीं तातूंत शिक्षण घेतात. चडशीं भुरगीं टेक्सासांत आसात. ती पंधरवड्या सावन तीन सप्तकां मेरेन चलपी अभ्यासक्रमांत हजर रावतात. तशेंच पालकांकय भुरग्यां वांगडा शिबिरांत रावपाक मेळटा. हे खेपे हीं शिबिरां ऑगस्टाच्या निमाणे मेरेन चलतली. तांतूत 15 दीस वाड केल्या. धर्म आनी संस्कृताय शिकले उपरांत भुरग्यांक प्रमाणपत्र मेळटा.
अभियंते आनी दोतोर भुरग्यांक फुकट शिकयतात
1985 वर्सा अमेरिकेंत पयलें हिंदू शिबिर सुरू करपी सुभाष गुप्ता म्हणटा, आमी सामके ल्हान प्रमाणांत हाची सुरवात केल्ली. अमेरिकेंत रावपी भारतीय अभियंते, दोतोर, वेवसायीक आनी आयटी तज्ञ ह्या शिबिरांनी भुरग्यांक धर्म आनी संस्कृताये विशीं शिकयतात. तांकां सगळ्यांक स्वयंसेवक म्हण्टात आनी ते कसलेच शुल्क घेनात. ह्या शिबिरांनी भुरग्यांक शिकोवपा खातीर भारतांतल्यान कसलेंच सामान लेगीत आयात करिनात.
कॅम्पसा खातीर भारतीय संस्थानी 837 कोटी रुपया उबारले
अमेरिकेंत हीं शिबिरां चलोवपा खातीर भारतीयांच्या वेगवेगळ्या संस्था कडल्यान 837 कोटी रुपया एकठांय केल्यात. वांटेकार जावपी भुरग्यांच्या पालकांकडल्यान शुल्काच्या नांवान फकत नाममात्र रक्कम घेतात. टेक्सास, न्यूयॉर्क, कॅलिफोर्निया, न्यू जर्सी, अलाबामा आनी ह्यूस्टन ह्या सारक्या जायत्या राज्यांनी भारतीय संघटनांनी जमीन विकत घेतली आनी शिबिरांखातीर इमारती बांदल्यो. ह्यूस्टनच्या हिंदूंचे विजय पालोडे हांच्या मतान वेगवेगळ्या राज्यांनी बांदिल्लीं ह्यो सुवाती अमेरिकेंतल्या भारतीयांच्या फुडल्या पिळग्यांच्या उपेगी पडटल्यो. आतां भारतीयांची तिसरी पिळगी अमेरिकेंत आयल्या. भारतीयांनी आपल्या भुरग्यां मदीं धर्म आनी संस्कृताये विशीं जागृताय निर्माण करपा खातीर हिंदू शिबिरां सुरू करपाचें थारायलें. ताका बरो प्रतिसाद आनी येस मेळ्ळां. अमेरिकेंतल्या हेर 25 राज्यांनी अशीं हिंदू शिबिरां सुरू करपाचे यत्न सुरू आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
