भांगरभूंय | प्रतिनिधी
नवी दिल्ली, खबरां संस्था ः प्रधानमंत्री नरेंद्र मोदी हांणी तिसरे खेपे प्रधानमंत्री म्हणून सोपूत घेतले उपरांत ताची लोकप्रियता आनीक वाडल्या. 14 जुलयाक तांच्या एक्साचे फॉलोअर्स 10 कोटी जाल्यात. फाटल्या तीन वर्सांत तांचे फॉलोअर्स सुमार तीन कोटींनी वाडल्यात अशें म्हण्टात. सरकारी प्रतिनिधीं मदीं प्रधानमंत्री नरेंद्र मोदी हांचे संवसारभर सगळ्यांत चड फॉलोअर्स आसात. तांणी स्वता एक्सचेर पोस्ट करून आपल्या फॉलोअर्साचे उपकार मानून ही खबर शेअर केल्या.
संवसारीक फुडाऱ्यां मदीं अमेरिकेचे राष्ट्राध्यक्ष जो बायडेन 38.1 कोटी आनी तुर्कियेचे अध्यक्ष रेसेप तय्यिप एर्दोगन 21.5 कोटी फॉलोअर्स आसात. भारतांतल्या फुडाऱ्यांची तुळा केल्यार प्रधानमंत्री मोदी फालोअर्साच्या मळार हेर फुडाऱ्यां परस खूब फुडें आसात. आम आदमी पक्षाचे फुडारी अरविंद केजरीवाल हांचे 27.5 कोटी फॉलोअर्स आनी लोकसभा विरोधी पक्ष फुडारी राहुल गांधी हांचे 26.4 कोटी फॉलोअर्स आसात.
पीएम मोदी हांणी केल्ल्या पोस्टांत तांणी म्हणलां, “एक्सचेर 10 कोटी फॉलोअर्स पार जाले. ह्या नव्या माध्यमाचेर आयले उपरांत चर्चा, वादविवाद, लोकांची इत्सा, विधायक टिका आनी हेर संदेश वाचपाची खोस जाली. फुडाराकय ह्या माध्यमाचेर आनीक आनंद मेळटलो अशी आस्त बाळगता.”
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
