दिवचल म्हालांत पावसाचो आकांत

भांगरभूंय | प्रतिनिधी

सगळ्या न्हंयांक हुंवार; हुंवाराची परतून दुगदूग

भांगरभूंय । प्रतिनिधी

दिवचलः दिवचल म्हालांत फाटल्या सप्तकांत शेनवारा आनी आयतारा पावसान धुमशेण कांडिल्लें. उटंगाराच्या पावसान झोड दिवन सुमार देड कोटीचें लुकसाण केल्लें. आतां परतून आयतारा पावसान आकांताळें रूप घेतिल्ल्यान सांजे वेळार हुंवारा सारकी परिस्थिती निर्माण जाल्ली. अंजुणें धरण 89 मिटरां मेरेन भरलां. सोमारा तातूंतल्यान उदक सोडपाची शक्यताय आसा.

अस्नोडेंची पार न्हंय, दिवचल न्हंय, सांखळेची व्हाळवाट न्हय तशेंच शापोरा न्हंय तशेंच म्हालांतले सगळे व्हाळ उपाट भरून व्हांवपाक लागिल्ल्यान कांय कडेन न्हंयांनी धोक्याची पातळी हुंपपाक पावल्या. म्हालांतली लोकजीण विस्कळीत जाल्या. खूबश्या वाठारांनी तशेंच रस्त्याचेर उदक सांचिल्ल्यान येरादारीचेर परिणाम जालो. लोखेरे, पिळगांव, न्हावेली, भटवाडी ह्या वाठारांतल्या कांय घरांनी उदक घुशिल्ल्यान लोकांची धांदळ जाली.

आपत्कालीन नियंत्रण विभाग, दिवचल उजो पालोवपी दळ तशेंच शिंपणावळ खातें स्थितीचेर नदर दवरून आसात.

सांखळेचे व्हाळवाट न्हंयेक हुंवार आयिल्ल्यान बाजारपेठेंत उदक घुसचें न्हय हे खातीर शिंपणावळ खात्यान सगळे पंप चालू दवरून व्हांळांतलें उदक पंपींग करून व्हाळवाट न्हंयेंत सोडपाचें काम दनपारच्यान सुरू केल्लें. दिवचल न्हंयेचे पातळेंत लेगीत व्हड प्रमाणांत वाड जाल्या. सगळ्यो न्हंयो तशेंच विवीध उपन्हंयो आनी व्हाळ उपाट भरून व्हांवतात. ताका लागून मुळगांव, सांखळी, न्हावेली, पिळगांव, नानोडें वाठारांतल्या कांय रस्त्यांचेर उदक सांचिल्ल्यान येरादारीचेर परिणाम जालो.

दिवचल उजो पालोवपी दळा वतीन मजत वावर चालू दवरला. साबार वाठारांनी पडझड जाल्ल्यान उटंगाराच्या पावसांत आडखळी पयस करचे खातीर धांवपळ चालू आशिल्ली. अधिकारी राहूल देसाय हांच्या मार्गदर्शना खाला उजो पालोवपी दळाचे जवान मजत वावरांत व्यस्त आसात.

म्हालांतल्या तशेंच गोंयांतल्या पावसाचो आनी हुंवार परिस्थितीचो नियाळ घेतना जिल्होधिकारी तशेंच म्हाल पांवड्याचेर अधिकारी, मामलेदार, आपत्कालीन विभाग हांकां सतर्क रावचे, असो आदेश मुख्यमंत्री डॉ. प्रमोद सावंत हांणी दिला.

शिंपणावळ खात्याचे अधिकारी के. पी. नायक, विनोद भंडारी, निलेश पोकळे हांच्या पुराय पंगडान स्थितीचेर नदर दवरल्या.

दिवचलेचे आमदार डॉ. चंद्कतांच शेट्ये हांणी दिवचले पावसाचे स्थितीचो नियाळ घेतना शिंपणावळ खातें तशेंच आपत्कालीन विभागाक चड जागरूक रावपाक सांगलां.

मयेंचे आमदार प्रेमेंद्र शेट हांणी लेगीत मयें वाठारांत विवीध सुवातांचेर जाल्ले पडझडी संबंदांत उजो पालोवपी दळ तशेंच अधिकाऱ्यां कडेन संपर्क करून सगळे तरेची मजत करपाची सुचोवणी केल्या. सांखळेची नगराध्यक्ष रश्मी देसाय हांणी म्हणलां, आमी स्थितीचेर नदर दवरून आसात. परिस्थिती नियंत्रणांत आसा. शिंपणावळ खात्याचे अधिकारी एकसारके उदकाचे पातळीचेर नदर दवरून आसात. पंपींग चालू दवरलां, ताका लागून बाजारपेठेंत उदक घुसपाची शक्यताय ना, अशेंय तांणी सांगलें.

संबंदीत खात्यांक मुख्यमंत्र्यांची सुचोवणी

आपणें स्थितीचेर नदर दवरल्या. परिस्थिती सध्या तरी नियंत्रणांत आसा. शिंपणावळ खातें तशेंच सगळ्या आपत्कालीन नियंत्रण विभागांनी सतर्क रावून ताकतिकेची मजत करची, अशी सुचोवणी आपणें संबंदीत खात्यांक केल्या, अशें मुख्यमंत्री डॉ. प्रमोद सावंत हांणी म्हणलां.