भांगरभूंय | प्रतिनिधी
मुख्यमंत्रीः मिडिया, मनरिजवण मळाक घटसाण दिवपा खातीर आयोजन
भांगरभूंय । प्रतिनिधी
पणजीः गोंयांत अंदूं पयलेच खेपे आंतरराष्ट्रीय चित्रपट महोत्सवाचे (इफ्फी) जोडीक 20 ते 24 नोव्हेंबर ह्या काळांत मनरिजवण संस्थे वतीन (ईएसजी) ‘व्हेव्झ’ ह्या महोत्सवाचें आयोजन केलां. संवसारभरांतल्या मिडिया आनी मनरिजवण उद्देगा खातीर हो महोत्सव म्हत्वाचो थारतलो, असो दावो मुख्यमंत्री डॉ. प्रमोद सावंत हांणी केला.
महोत्सवाची म्हायती दिवचे खातीर आयतारा पणजे घेतिल्ले पत्रकार परिशदेंत मुख्यमंत्री उलयताले. ह्या वेळार तांचे वांगडा ईएसजीची मुख्य कार्यकारी अधिकारी (सीईओ) अंकिता मिश्रा आनी उपाध्यक्ष तशेंच आमदार डिलायला लोबो हाजीर आशिल्ली.
इफ्फीक लागून गोंयची नामनां संवसारभर पावल्या. उद्देग, मिडिया आनी मनरिजवण मळा वयले संवसारभरांतले दिग्गज इफ्फी निमतान गोंयांत येतात. ते हेच खातीर ह्या काळांत ह्या मळां खातीर म्हत्वाचो आशिल्ल्या व्हेव्झ महोत्सवाचें आयोजन गोंयांत करपाचो निर्णय केंद्रीय म्हायती आनी प्रसारण मंत्रालयान घेतलां. मंत्री अश्विनी वैष्णव हांणी कांय दिसां आदीं दिल्लींत ह्या महोत्सवाची घोशणा केल्ली, अशी म्हायती मुख्यमंत्री डॉ. सावंत हांणी दिली. माध्यम आनी मनरिजवण मळार वेगवेगळे बदल जातात. तातूंत तंत्रज्ञानाचो आस्पाव जाला. ताका लागून ह्या मळार रोजगाराच्यो संदी वाडटात. तेच नदरेन चर्चा करचे खातीर ह्या महोत्सवाचें गोंयांत आयोजन जाता. ह्या मळार वावर करपी संवसारभरांतले तज्ञ इफ्फी निमतान गोंयांत आसतात. तेच खातीर हो महोत्सव इफ्फीच्या काळांतूच घेवपाचें निश्चीत केलां, अशें मुख्यमंत्री डॉ. सावंत हांणी सांगलें.
गोंय जातलें मनरिजवणेची राजधानी
गोंय हें देशाची पर्यटन राजधानी आसा. ते उपरांत आतां गोंयाक मनरिजवण मळा वयली राजधानी करपांत व्हेव्झ महोत्सवाचें व्हड योगदान आसतलें. मिडिया, मनरिजवण, अॅनिमेशन ह्या सारकिल्ल्या मळांचेर गोंयांतले शेंकड्यांनी तरणाटे वावुरतात. तांचे खातीर हो महोत्सव म्हत्वाचो थारतलो, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
